今日 11:24

輪證贏家丨泡泡瑪特嘔白泡 嘔得多就死得早

噚日揀咗隻恒指熊(63560)出嚟，而呢一轉淡倉都真係Hold到全日，以低走小時圖10線後出(63560)至唔過夜計嘅話，呢一趟平均有27.42%正數。

呢排指數走勢都仲係日升日跌，做開Swing Trade嘅都真係覺得無問題，但有時chok得太快都真心難玩，所以都開始有戰友換場去咗金市美市幣市度玩，Anyway，大家正數就好啦。

依家9點53分，作戰室都係大約五分鐘前出咗注淡倉。皆因今日恒指初段表現都好chok，進取少少見指數唔過五分鐘圖500線向下穿返今朝開市位先至出注，仍然都只係爬格仔為主。

指數難玩轉睇個股，呢兩日睇到眼都突嘅，都莫過於隻藍籌泡泡瑪特(09992)，兩日插三成，皆因市場睇完份業績都表示不滿，大行亦紛紛下調目標價，係咁易搵一搵啲大行報告，下調幅度由15%至43%都有；跟手以每股介乎148.4元至157.8元，在市場回購合共394萬股，均價152.21元，動用款項近6億，以撐股價。

係呀，到依家10點9分恒指走勢撚狗mode，而泡泡瑪特就「穩定地着綠燈」，日線圖上見有股價暫時出十字星，只要今日佢仲出到支陽燭而低位係高過噚嘅話，咁「身懷六甲」就會成立，係爭保歷力通道口同埋Slow STC(14.3)轉返上去。

換小時圖見10線同股價開始靠近，咁啱啦，借埋條10線嚟量度股價到底上唔上得到返上去。

依家最遠嗰隻泡瑪牛已經有100%街貨，除咗會增發之外，太多街貨都會容易出現擘價太闊嘅問題，所以揀隻低街貨嘅牛(57644)，收回價145元，同現價有約7蚊距離，街貨有18.16%雖然都另一隻0%街貨可以揀，但佢嘅槓桿有約10.1倍比嗰隻0%街貨嘅8倍為高，短線ok。

前題要上得到小時圖10線，萬一唔得呢？甚至股價借日線圖保歷加口拓闊而迫Slow STC(14.3)出超賣再超賣呢，咁泡瑪熊(65291)，收回價218元，同現價有成66蚊距離，所以槓桿得約2.3倍。

如果佢咁樣向下再落嘅話，借到日線圖嚟出隻熊咁玩嘅，咁真係有排落。

作者阿珊，以技術分析專心玩輪證，唔貪心，努力賺取我家肥貓罐罐ฅ^•ﻌ•^ฅ。

直接去Patreon搜尋「cbbcwar」領取七日免費試用即市作戰教室