12月23日 13:31

【輪證下半Part】小心忘記原來有貨

上半場初段時間喺作戰室同戰友出過注淡倉之後，有再嚟反手好倉諗住指數都可以行得下Swing，但可惜去到上半場後段都開始畫到指數喺19800至19850點呢50點區間位做上落，行得慢就梗架啦，還好臨完半場前指數都浮得到上19850點多少少，好倉總算有位可以甩到身。

年尾靜局就預咗嘅，對於我哋呢班都仲睇緊市嘅人嚟講，坦白講全年成績基本上都已成定局，呢幾日執到格仔嘅都入作Bonus。

個股方面今日比較遜色嘅應該係隻騰訊(00700)，半日收241.4元，跌1.17%；而近期有喺文度提過嘅中移(00941)，甚至再早少少時間嘅聖誕鐘滙控(00005)都見同大市一齊着綠燈，半日分別報75.75元同74.9元，分別升0.53%同1.08%。

下半場開市後見指數變動亦都不大，目前先靠五分鐘圖嘅10線企住喺19850點呢個位，戰友們有好倉嘅都借緊呢個條線，睇下指數有無本事再向上走多少少啦。

仍然都只係爬格仔中，而且區間位唔多，格仔亦爬得慢，如果你都落咗場嘅話，小心出咗注之後見個市唔郁，隨時唔記得咗自己原來有貨喎。

作者阿珊，以技術分析專心玩輪證，唔貪心，努力賺取我家肥貓罐罐。

Patreon作戰教室七日免費體驗：https://www.patreon.com/join/cbbcwar