10月30日 13:02

【輪證下半Part】貪心望住牛證重貨位

今朝睇咗隻美股Meta(META)，皆因集團將會公布業績，所以亦都pick咗隻Meta Call(10440)，講明冷吼，所以注碼上都注意一下。而呢隻嘢基本上都係等今晚放榜之後股價走勢，所以應該都係喺聽日先至見到隻(10440)有反應。

先放埋隻(10440)一邊住，睇返個市先。今朝低開後有見低走，但確實被五分鐘圖嗰支超特大陽燭抽上嚇死朕，不過，去到中軸線咪又係無，作戰室今日主力以淡倉應市，比較有驚喜嘅係去到11點初段保歷加通道口都拓闊埋，借勢再落兼Lock住保歷加底線同10線之間呢個位夾住Swing落去，到11點半左右例牌見有正數先收網，唔過Lunch。

指數由今朝20600點樓上向下落到半場低位見20311點，牛熊證街貨圖上見首兩層牛證已經全數被收回，承如今朝所講，借牛熊證街貨圖嘅牛熊兩邊重貨區框住嘅20000至21000點呢1000點範圍去玩嘅話，同步見小時圖保歷加通道口拓闊，少少心理準備定見20000點唔出奇。

知道下個星期大選+議息嘅，市會唔會過埋今日期結日之後又再吽過仍然未知，但暫時肯定嘅係，恒指條10天線再次失守，而向下再掃返落去拉線亦用返之前嘅9月27日裂口底部19954點，咁同牛熊證重貨Lock住嘅範圍低部20000點有50點差距，差唔多啦。

如果順方向嘅，由依家起計向下掃落去就仲有300零點水位，反方向借返10天線(中午見20532點)作為上方量度線的話，恒指熊(56738)，收回價20950點，同現價有約600點距離，企高啲無蝕底，因為呢隻嘢嘅槓桿有約32.8倍，只不過係依家五分鐘圖上見指數同Slow STC(14.3)都唔係一個適宜出淡倉嘅環境，等返Slow STC(14.3)兜返上超買先至出都唔遲，順便咪當Back test返10天線擋唔擋到路囉。

(56738)今次係可以考慮玩得耐少少嘅，所以都pick定呢隻咁遠價，注碼上亦都留意一下，始終目前市場不確定性因素比較多，勿瞓身。

作者阿珊，以技術分析專心玩輪證，唔貪心，努力賺取我家肥貓罐罐。