10月2日 14:00

【輪證下半Part】22700點爭少少

今朝揀咗隻恒指牛(51637)，約好借定五分鐘圖嘅10/20線企好再出。以今朝Patreon出文嘅時間為10點14分，如常的用10分鐘作為睇文時間，即於10點24分時再睇返個走勢圖，當時指數已經踩完五分鐘圖嘅10線上行，(51637)可以出動。

如同平時一樣以10分鐘時間作為買貨時間的話，期內(51637)高低位做過0.223元/0.195元，平均買入價為0.209元。

借10線作為落場入口，而同樣地用返10線作為走貨出口，一樣可以；當然啦，去到後段見整條保歷加通道平衡地上行而將10線放到去20線作為走貨線的話係可以嘅，望望自己嗰注同埋望望自己咁做嘅話守唔守得到，守得到就用啦。

以臨完上半場前10分鐘見指數失守10線走隻(51637)，同步當唔揸貨過Lunch的話，以期內(51637)高低位見過0.25元/0.239元計，平均走貨價為0.2445元，呢一超追到指數迫近22700點前而清嘅，平均先食35.5格或14.52%。

另外，其實今朝都揀咗隻恒指Call(25985)出嚟，係好少揀Call因為普遍牛熊證嘅槓桿都比輪為高，maybe因為輪係無打靶機制啫。

揀隻(25985)出嚟其實原意係等指數上22000點，真係無諗到文一出，佢就到步，Well，用返同一個方法入市，即於出文後再on top加10分鐘去睇市，見五分鐘守住10線而出(25985)，期內(25985)高低位見0.295元/0.285元，平均買入價為0.29元。

「22000點都到囉，咁(25985)向上望望咩好呀？」通常都係追索返上一個高位，依家全城22700點叫緊，而依家1點38分，指數暫時最高見過22667點，比預計嘅升多667點水位當然可以率先離場；而如果堅守下去嘅話，不如放隻風箏出去做沽半留半嘅策略，一來收返成本先，二來放飛唔怕自己全清之後Miss咗再上嘅機會，咁收咗成本又有咩事都唔會好肉赤先啦！

贏錢事少，玩槓桿貨安全事大！(月報告報同樣會以失10線後清好倉為準，純嚴守一貫策略)

作者阿珊，以技術分析專心玩輪證，唔貪心，努力賺取我家肥貓罐罐。