8月14日 13:21

【輪證下半Part】20點都係正數

今朝揀咗隻恒指熊(66030)出嚟，因見指數於小時圖保歷加頂同噚日高位相若，拉到條誇時軸圖嘅阻力線出嚟，又開市後高位掂到一下呢個位就回，所以執定淡倉。

不過，今朝出文時間10點12分，如常用返10分鐘睇文嘅話，即於10點22分再睇返個走勢圖嘅時侯，指數剛好出「錘頭」兼Slow STC(14.3)出觸底，(66030)唔係時候出場。

如果用返一貫做Swing Trade做法，即於五分鐘圖上Slow STC(14.3)見超買位就出(66030)，博指數向下Swing落去嘅話，按今朝稍後時間見嘅Slow STC(14.3)最多都只係得%K線自己一個人上到80以上，%D線最多都只係去到77，喺未到超買位就向下回，唔係慣常出Swing淡倉嘅條件，所以嚴格嚟講今個上半場係出唔到隻(66030)。

Lunch time嘅時侯同咗一位應該有廿年無見嘅中學同學傾計，如今兩個四張嘢嘅就梗係講返以前中學時嘅生活點滴啦，都問下有無搵阿邊個同阿邊個，讀書嘅時侯只係覺得考試好痛苦；但依家諗返起，成班人柴娃娃咁返學，一齊考完LCCI之後去食豆腐花，都幾好笑。

午後返嚟見指數有似想再創日內新低，再換上保歷加通道午後指數擺位低於中軸以下位置，作戰室再來淡倉出動諗住睇底線。一數，原來得30點左右，唔理，30點照殺，反正今朝都係20、30點係咁食之下，夾夾埋埋都成百點落袋。

而如果你都見到小時圖嘅保歷加通道口有拓闊的話，咁淡倉追出去真係唔係問題；否則都可能喺呢條窄窄嘅保歷加裏面運行咋。

作者阿珊，以技術分析專心玩輪證，唔貪心，努力賺取我家肥貓罐罐。

Patreon作戰教室七日免費體驗：https://www.patreon.com/join/cbbcwar