7月23日 13:21

【輪證下半Part】沉着氣應市

坦白講呢兩日DT都真係幾難做，唔係行得慢嘅問題，捱時間但方向啱都真係事少，最慘嘅係捱時間嘅同時仲要捱技術位，好似今朝咁牛熊各揀定一隻就係捱緊小時圖嘅中軸線，最後雖然企於中軸樓上，按策略計係可以出恒指牛(56107)；但所謂嘅捱技術位，就係當線出倉後，佢就只係停留喺上面，躺平磨住條線，連少少斜度都無，咁先至心煩。

呢啲情況，Day Trader真係好易「瀨嘢」，主要係無支「無比膏」喺手可以止痕，見到有少少方向諗住偷位出動博指數行下，隨時一入就被困，唔好彩嘅左右兩巴掌先至出返嚟市場，身心俱疲。

唔止你，我都會，作戰室裏面所有人都會，因為我哋同你哋都係一樣，只係人一個，對住咁樣嘅市又乜可能唔會燥底？但燥底都無辦法，唯有學習等待適合嘅時間先做適合嘅事，佢睇我唔到時我都時運高咩都睇唔到，休息一兩日個市唔會無咗之餘，Day Trader都要放假嘅(幾難得有嘅假期~)，所以呢兩日作戰室都「難得放假」(只係大家都各自專心工作或專心同家人去旅行啫，我都仲留守大本營嘅)。

如果要落場嘅，就更加要學習沉着氣應市，自己內心煩燥不安，莫講話對住個市，求其對住個地下(係，耷低頭就會見到嘅地下)你都想鬧爆，30幾度大熱天時真係唔好搞啲咁嘅嘢。

今朝Set好借小時圖中軸線出倉，由於出文時見指數卡住喺中軸線，所以先揀定恒指熊(64738)同恒指牛(56107)。睇下指數放喺邊就出咩應市。

以今朝出文時間為10點20分，如常的用10分鐘作為睇文時間的話，則於10點30分再睇返條恒指，當時見指數17565點，五分鐘圖Slow STC(14.3)出咗觸底，而小時圖當時中軸位為17589點，擺位計指數仍然處於中軸線以下，但五分鐘圖Slow STC(14.3)見觸底，亦都唔係一個出淡倉嘅時機。

純以五分鐘圖嘅Slow STC(14.3)做Swing Trade的話，當時的確可以比隻好倉出去博一趟，安全嘅見五分鐘圖當時有唔少平均線喺指數頭頂，作戰室亦安全起見等上到線之後先至比出好倉。

其實等多五分鐘的話，即11點35分，其實指數反方向上破返小時圖嘅中軸線，咁就更能肯定(56107)上返線+五分鐘圖借埋Slow STC(14.3)觸底而出動。

以10點35分起計如同平時用10分鐘入貨的話，期內高低位做過0.051元/0.046元，平均買入價為0.0485元。

到依家其實已經下半場開咗市大約7分鐘左右，小時圖上見目前指數仍然企於中軸線以上，速度比電車更慢；唔係，咁係侮辱咗部電車...

Anyway，Lock好小時圖中軸以守(56107)，唔肯定今次可唔可以用時間換格仔，因為連少少斜度都無。望望隻(56107)現時證價都有0.05元，趁未有事發生而Cover到手續費走人免被困可以；望下出面個天今日都幾好天呀！咁嘅市咪困住自己喺個場裏面啦！

作者阿珊，以技術分析專心玩輪證，唔貪心，努力賺取我家肥貓罐罐。

Patreon作戰教室七日免費體驗：https://www.patreon.com/join/cbbcwar