7月10日 13:42

【輪證下半Part】等確認穩陣啲

今朝打算違反地心吸力出隻恒指牛(56580)，講係真係高難度動作，下面咁重牛證街貨偷位出好倉，真係睇少眼都死。而出(56588)嘅原因係當時博緊指數可以企喺小時圖中軸線之上，一失線即刻可以拜拜。

以今朝出文時間10點20分，如同平時一樣以10分鐘去睇文的話，即於10點30分再睇返走勢圖，當時小時圖中軸為17633點計，指數做緊17671點，指數仍然守住中軸線，符合出場條件。

如同平時一樣，都係用10分鐘圖出貨的話，按期內(56580)高低位做過0.054元/0.051元，平均買入價為0.0525元。

導演度橋拍戲都未必度得咁準，呢頭出完貨之後，嗰頭即刻跌穿條線比你睇，順帶連五分鐘圖嘅中軸都穿埋，(56580)張凳唔好話坐暖，Pat Pat只係掂到一下又要起身。

其實唔對路即走真係好正常，除非有幸運之神眷顧你，喺你想入嘅時侯老細嗌你/同事搵你/阿仔叫你，甚至隻貓親你，呢一Round應該都可以避得到；因為真係穿得太快啦。

嚴守策略下即走(56580)，同以10分鐘執包袱計，期內高低位做過0.054元/0.045元，平均走貨價為0.0495元，換言之呢一趟無妄之災平均輸3格或5.71%。

還好作戰室喺過中軸之後再補多注淡倉出去，午後返嚟見指數再向下行，啱啱1點28分時仲見到倒跌添，嚴守策略同止蝕真係唔係無用架！或者今日都係等睇指數喺日線圖上10/100線夾住嘅情況先啦。

作者阿珊，以技術分析專心玩輪證，唔貪心，努力賺取我家肥貓罐罐。

Patreon作戰教室七日免費體驗：https://www.patreon.com/join/cbbcwar