6月20日 13:39

【輪證下半Part】「圓底」定「圓頂」？

今朝喺呢度無揀過任何貨出嚟，事關今朝睇市去到10點打後都仲未見到指數嘅方向，五分鐘圖又生「三角形」喎，仲要被戰友「催交稿」喎(哈哈)，所以都係決定以靜制動，睇定啲先至出手。

不過作戰室又唔係食蛋嘅，去到10點尾差不多11點左右，見到指數向下失守「三角形」底線，淡倉出動博小時圖高位出兩友避雷針向下落。呢注淡倉又未係話可以大殺三方，只係咁啱順得到方向，Lunch time叫杯凍飲解熱都唔駛考慮啫。

依家1點4分，下半場剛剛開市，指數有見兜底向上，五分鐘圖先過咗10線，但慢活嘅情況仍然未變。作戰室好倉出動嘅，博得到五分鐘圖條10線，都仲有條20線要再博，始終爬得返上保歷加上升通道裏面嘅好倉先至可以hold得比較鬆一口氣。

另一邊廂，小時圖今朝見過兩支避雷針後，午後其實10線都浮到上水面。借到線反方向上行變成「圓底」？還是都係守唔到線，向下變「圓頂」？賭罐可樂算啦。

明日下午外出，與舊老細嘅老細have lunch，so...【輪證下半Part】暫停供應。

作者阿珊，以技術分析專心玩輪證，唔貪心，努力賺取我家肥貓罐罐。