5月22日 13:23

【輪證下半Part】小時圖10線唔過 淡倉有着落

今朝揀咗隻恒指牛(57870)出嚟，係借小時圖10/50線之間條罅位嚟做Trade架咋，所以我都好擔心出文之後會唔會指數已經完全唔同晒個樣，於是喺今朝早篇文最後講定聲：萬一你睇完篇文之後，指數已經到咗小時圖10線的話，咁就比多少少時間佢，睇下佢過唔過線，過到線先出；否則淡倉反借10線做阻力，向下睇返50線先。

以今朝出文時間為10點11分計，如常的用10分鐘作為睇文時間，即於10點21分時再睇返恒指走勢圖，見指數上到高位1935X點之後向下回落，五分鐘圖見100線擋路。

換上小時圖的話，則見指數於10線上留下上影線。換言之，今朝揀嘅(57870)出唔到，反為淡倉有機會出場，只係我喺今朝篇文上面無揀到隻淡倉出嚟啫，咁我希望你自己有pick到啦。

而呢一注淡倉如果唔貪心的話，11點半未到指數升幅已經縮返去得10點左右，Slow STC(14.3)兩線亦見超賣位，同步由於保歷加通道口收窄嘅關係，所以都到咗保歷加底線，喺呢啲時侯散場嘅話，正數應該無問題嘅。

作者阿珊，以技術分析專心玩輪證，唔貪心，努力賺取我家肥貓罐罐。