5月16日 14:45

【輪證下半Part】街貨/貼價證的休途

今朝喺呢度無揀到貨出嚟，事關見指數喺今朝較早時段出「三角形」，都真係未見有方向。

不過，喺10點半打後見指數踩到五分鐘圖10線向上踩之餘，仲過埋朝早開市個高位，戰友們亦毫不客氣地出好倉追上，一追，唔再追，懶亦都見指數貼住線運行，咬到下畫2點鬆啲見指數失守10線之後，雖然有中軸接住，但見保歷加通道口收窄，為免被個市悶死，戰友都陸續收工走人。

依家2點16分，恒指暫時高位見過19442點，第一層熊證街貨全數死亡，呢度有相當於293張期指街貨，望住呢個牛熊證街貨圖，坦白講指數唔向上殺仲可以去邊？不過咁，指數上到呢個高位，大家畏高係合理，同步其實都可以留意住呢排新上市嘅牛證，最貼嘅收回價上到邊。如果仲好似依家咁，上極都係同現價隔九條街嘅話，咁還可以尚算安少少心地出好倉追上；但如果牛證開始出到同現價好貼嘅，拉近返牛熊兩邊嘅距離，仲要因為大家追升追到盲，係咁坐住近牛的話，咁就會開始形成近重牛嘅出現。

一旦有以上嘅情況，就要開始alert指數或會再來高位整固，因為指數會由依家靠近熊證街貨而牛證又遠無得揀；變成牛熊兩邊都近而且仲隨時上下其手都可以。

望望今日新上嘅牛證，最貼價嘅收回價今日見18963點，同現價有約441點距離，以呢個點數計都近返嘅；但就要睇埋聽日，如果指數再上，而牛證仍然企住喺18963點的話，諗到諗到個距離又會被拉遠咗，咁之前講嘅有可能出高位整固嘅局面就未有咁快出現啦。

呢個就係街貨同貼牛熊證嘅另一個計算方法啦。

作者阿珊，以技術分析專心玩輪證，唔貪心，努力賺取我家肥貓罐罐。