5月10日 13:41

【輪證下半Part】袋咗落袋先係錢

今朝揀咗隻恒指牛(57451)出嚟，主要都係想腦輕鬆少少，順住指數上行嘅方向向上就算。計劃借五分鐘圖10/20線踩好上而出動；萬一穿線嘅就再退到用Slow STC(14.3)落到超賣位而出，當普通Swing Trade一次就算。

以今朝出文嘅時間10點3分，如常用返10分鐘作為睇文時間的話，則於10點13分時睇返恒指走勢圖，當時喺五分鐘圖上見指數低走10線，但未到中軸，咁好簡單啦，等睇指數會係到中軸再穿，還是到中軸有支持；如果反方向上10線的話，亦都可以。

等到大約10點30分，指數重上10線兼有少少出「圓底」走勢，未確定嘅，再等多五分鐘試線，都仲見到指數企到喺10線之上，(57451)出啦。

按10點35分起計如常用10分鐘出(57451)的話，期內(57451)高低位見過0.038元/0.031元，平均買入價為0.0345元。

同平時一樣，借10線落場就用返10線做量度線。期後見指數都一直keep住喺10線之上運行，午前再見高位18873點，而(57451)未甩線就可以keep住過lunch。

下半場開市，指數甫開市即刻向上高衝，依家1點23分，指數高見18978點，即將18800至18899點嘅嗰層熊證都收埋，嗰度有成過千張期指街貨架。

睇住佢一路高走，同10線愈來愈遠，借返10線做量度線當然無問題，但如果見好收，或者選擇沽半留半的話，我欣賞你！因為你完全明白咩叫做「袋咗落袋先係真錢」嘅道理。

作者阿珊，以技術分析專心玩輪證，唔貪心，努力賺取我家肥貓罐罐。

Patreon新增內容《開市前速報》，七日免費試用：https://www.patreon.com/join/cbbcwar