1月5日 14:15

【輪證下半Part】直接收工

今朝無揀到任何貨出場，主因係見指數反方向倒升過後，預期佢唔會再上得去邊；反過來比淡倉出手的話，向下亦都唔見得會再次瘋狂地落返去今朝低開附近。所以今日都只係處理咗隻蘋果(AAPL.US)嘅Put(10043)，平均有3格或6.67%落袋完咗呢注冷門嘢算數。

上半場完場見指數跌23點，報16622點，下方牛證第一層全數收回之後，變相16400至16499點呢層成為最貼價牛證街貨層，呢層有相當於642張期指街貨，喺開市首3分鐘見嗰條長下影線出現之後，指數同Slow STC(14.3)同步回升至半日高位16745點，踩返上第一層熊證街貨但連一半都殺唔到又再回。完半場見指數於五分鐘圖上企喺100/150線之上。

望下日線圖，計到依家為止今日已經係恒指第三日被10/20線夾住，動彈不得。而牛熊證街貨圖亦都見到繼續靠近，指數隨時可以上下其手，食盡兩家茶禮。

終於等到下半場開市，等咗好耐，莫講話日線圖被線夾，如今連五分鐘圖都被線夾，下方100/150線同10線夾咗成20分鐘都仲夾緊，暫時只係得條Slow STC(14.3)係有反應...咁係無用架！牛熊證係對指數有反應，唔係對Slow STC(14.3)有反應呀！

可能話咗阿市兩和，終於都比多咗少少反應，午後小時圖見指數唔過中軸，但咪以為咁樣就開到淡倉，事關換上平均線的話就會見到下方有好多線喺度纏腳，100線都過得到嘅先至比淡倉啦，如果唔係直接收工算啦！

作者阿珊，以技術分析專心玩輪證，唔貪心，努力賺取我家肥貓罐罐。