今日 10:50
噚日揀咗隻恒指牛(61471)出嚟，還好出文後指數都仲有得再上，午前衝到見247，首八層熊證全數被收回。而(61471)雖然有正數，但隻牛太「重」啦，已經揀到最高槓桿同最貼價㗎啦，但都成毫三子跳唔起，不過正數就算啦。
急彈嘅後遺症通常都會急挫嚟打回原形。今朝起身見隔晚美股跌近1800點，韓股開市就溶斷，日經一開亦肚瀉mode都就知咩事。
港股今日低開300幾點，落返去24400點邊皮位之後，本身喺小時圖上面見到噚日最後高掛「十字星」+Slow STC(14.3)轉方向下行，諗住有得再落，但換個五分鐘圖有見指數企咗喺100線，及至開市之後有見指數兩次踩得住條100線再上，於是變陣以好倉追上，10點前有見指數向上撲返最近嘅10線後，先收起大約150點正數，安全啲好。
依家10點9分，五分鐘圖上見指數暫時處於保歷加下降通道運行，不過反手都未係好確認出得到(有入過Discord嘅都知我份人係幾咁保守)，皆因五分鐘圖上見10線位都未完全穿得到，依家出倉喺我眼中都只係當偷步mode。
再嚟到依家10點20分，指數重新落返去245，作戰室淡倉出動咗嘅，依家應該數住格仔，睇吓邊個位走。
暫時計指數都開始用返相對窄位嘅幅度運行，而作戰室目前都只係用五分鐘圖嚟借線偷位；所以諗住搵隻個股出嚟呢度睇睇吓有無得做，但搵搵吓搵到呢隻曾經熱門嘅冷門嘢，不過個圖真係得呀嘛~圖表派就係咁盲目㗎啦。
係銀娛(000027)，日線圖上見股價噚日隨大市高走過150線，不過佢係高開低走但全日升，所以出咗支實心陽燭，今日亦隨大市下行，低走返條150線，Slow STC(14.3)兩線於超買位有似%K線低走%D線。
換保歷加通道有見整條向上，咁所以有條件出返Swing Trade之下，觸頂向下有可能出現到。
不過，現市時場上得返唯一一隻銀河Put，熊證都無晒啦，呢個位先係最Kick嘅，就係(18870)，行使價29.3元，同現價有約16.3%價外距離，出年6月先到期，因為得一隻所以槓桿同引伸都無得做比較，低街貨係事實得1.9%唔駛比啦，但太冷所以未見有成交；用嚟當練習下睇圖囉。
諗住出文㗎啦，都10點38分，見指數企得住24700點樓上，五分鐘圖作勢見三線支持，恒指牛(62095)，收回價23525點，同現價有約1080點距離，槓桿有約21倍，已經係全場數貼價牛群中槓桿最高，今日新上所以未見有街貨。
作戰室都等緊睇吓有無位出第三次好倉，大家都睥到條中軸實一實。
作者阿珊，以技術分析玩輪證，唔貪心，努力賺取我家肥貓罐罐( Φ ω Φ )。
想睇埋美日台股、金油滙幣ETF嘅玩法，請往Patreon搜尋「cbbcwar」；《傻寶不懂的技術分析》系列已於Google Books Store上架，可免費試閱。
