今日 10:30
上個星期五揀咗隻恒指熊(53256)出嚟，諗住指數會向下再落殺樓下三層，每層過千張期指街貨。估唔到指數落到2280x點之後就真係唔再殺。11點打後指數喺五分鐘圖上見指數企返上10線後沿住10線/保歷加上升通道慢慢上行，作戰室都反手好倉出動
按噚日篇文裏面嘅策略，做返平時啲五分鐘圖觸頂向下Swing一趟就算。基於指數沿住保歷加頂同10線之間上行，所以Slow STC(14.3)喺朝早都比較大部份時間出超買再超買，只係估唔到佢咁升得，呢注喺呢度少輸9.55%，還好作戰室好倉揸過Lunch，時間換格仔。
周日喺社交媒體上得知著名股評人、人稱「沈大師」沈振盈於周六晚上離世，消息非常突然，多年來其敢言及個人風格鮮明，為沉悶嘅股市世界帶來不少生氣；作戰室都有戰友post出他離世新聞，大家紛紛留言「RIP」以表不捨。
還得記小妹初出茅廬仲做緊記者時，好多時都會打電話比「沈大師」就一啲事件/個股比啲評論我寫埋落條稿度，你喺電視機上面見到佢大辣辣咁嘅樣，同我喺電話裏面聽佢慢慢講佢嘅分析、意見，好似係一個老師咁解釋比我聽嘅暖男...希望你在天之靈得到安息。
嚟到10月最後一個星期，而且今個星期都有幾多議息會議，包括有美國、加拿大、歐洲同日本，又上個星期插完兩日之後，今個星期指數怕且都係散步mode；見今朝早恒指開升63點之後到依家9點45分，喺五分鐘圖上行咗個「楔形」出嚟就知，作戰室暫時都仲未出倉，連出邊個方向都仲度緊。
10點後作戰室終於都度到位同條件開出一注細注嘅好倉，主要都係見五分鐘圖20線重新守得返兼Slow STC(14.3)順得住上返去，逐個check point mark住係用嚟度住條飛仲可唔可以hold落去，有咩事寧願收廿點正數就算啦。
再嚟到依家10點14分，指數艱見創到日內新高，但戰友都係趁呢個位走咗注好倉算啦。
指數今日難玩係真嘅，無乜心情玩都係真嘅。
作者阿珊，以技術分析玩輪證，唔貪心，努力賺取我家肥貓罐罐( Φ ω Φ )。
想睇埋美日台股、金油滙幣ETF嘅玩法，請往Patreon搜尋「cbbcwar」；《傻寶不懂的技術分析》系列已於Google Books Store上架，可免費試閱。
