輪證贏家丨借小時圖100點間區位

噚日失心瘋地揀咗隻好冷門(喺輪證市場)嘅中海油田(02883)，皆因見佢日線圖唔算差，噚日逆市高走半成破埋個小型「平底三角形」頂線；Slow STC(14.3)兩線亦都喺超賣位暴力觸底，所以喺市上場僅餘嗰7隻Call之中，執咗隻海田Call(21390)出嚟。

呢注貨如果噚日有出到而選擇唔過夜嘅話，即日內平均場有三至五格；如果帶咗貨過嚟今日嘅話，依家9點45分見中海油田股價跌0.65%，而(21390)輪價平均為0.071元，同噚日計嘅平均買入價0.071元比，依家走人算是打個和，1格睇吓抵唔抵得晒你啲手續費啦。

「激氣?今朝指數高開後高後，點解有啲正股唔跟㗎?!」哦，咁好簡單啫，先喺正股嗰注嚴守止蝕策略之後，再喺恒指上身攞返咪得囉，今朝作戰室都係咁之嘛。

依家10點12分，作戰室第一注係出好倉追上，不過喺10點前有見指數已經撲到上小時圖20線前就全數收咗正數；所以到依家已經反咗手淡倉出咗去，捉返五分鐘圖換Swing Trade玩法，進取嘅貨已掟；安全嘅等緊線。

喺呢度都好似好幾日無睇過恒指(確實之前無北水，指數唔郁唯有向個股埋手，但可惜我搵個股又真係唔多叻)，今日睇返個小時圖先啦，見目前指數於小時圖上10/20線間夾，呢個區間位大約有100點到，10線位置亦都係整頭數嘅24000點。

配埋牛熊證街貨圖嘅話，已經下方牛證肥過我家肥貓，不過依家(10點18分)似乎連五分鐘圖都幫手守24000點咁。
假設先預指數於小時圖得嗰100點上落嘅話，而按目前指數是靠近下方10線嘅，咁即係先博指數觸底上行先。

恒指牛(60412)，收回價23728點，同現價有約360點距離，槓桿有約48.2倍，要進取少少借五分鐘圖嘅100線企住嚟出；安全嘅等下10/150線上過埋先囉。

作者阿珊，以技術分析玩輪證，唔貪心，努力賺取我家肥貓罐罐( Φ ω Φ )。

想睇埋美日台股、金油滙幣ETF嘅玩法，請往Patreon搜尋「cbbcwar」；《傻寶不懂的技術分析》系列已於Google Books Store上架，可免費試閱。