今日 10:46
噚日揀咗隻恒指熊(57622)，計劃等指數於五分鐘圖上有見Slow STC(14.3)上返超買位就出動。都唔係等唔到嘅，喺下半場1點35分已經見到Slow STC(14.3)兩線重反超買位，但留意嗰一下上到超買位指數係一回氣反方向爆上過百點再做埋日內新高，上到超買再等3點25分見至開始確認Slow STC(14.3)兩線觸頂向下離開超買位，變相(57622)符合出場條件嘅時間都有成個幾鐘，但就要預咗呢一注要過夜啦。
好彩今日指數低開，都唔理佢之後會唔會繼續下行往25000至25099點嘅重貨牛方向走，(57622)喺開市後先行收隊，呢注過夜貨平均都有9.5格或28.79%落袋。
至於喺作戰室今朝都係Plan定出淡倉，但同時都有提住戰友們，因為一開市已經見到五分鐘圖嘅Slow STC(14.3)中，%K線已經落到超賣位，所以順U盤方向而出淡倉再追嘅話都只係格仔貨，反過來安全嘅可以選擇等低開低走完，準備出第一轉嘅Swing Trade，而玩得耐，熟悉用技術分析嚟出倉嘅戰友，一早睇到住mark咗嘅陰陽燭出嚟都已經提早出好倉捉Swing，半個鐘唔駛就完成第一注。
依家10點14分，恒指低開後高走至依家重上25400點以上位置，小時圖上亦都見到指數爬格上保歷加中軸以上，但就被條10線頂住，搞到指數唔上唔落；而Slow STC(14.3)兩線勢頭保持向下。
再嚟到依家10點23分，指數向上再高走過晒五分鐘圖嘅平均線後，連小時圖嘅中軸都過埋，呢個位再硬追上去反而水位唔多，同埋睇返早兩日指數都係上到呢條線就見阻力嘅。
既然係咁就留意住小時圖50線，如果確認該線見阻力的話，恒指熊(57564)，收回價25800點，同現價有約400點距離，呢個位亦都高於日線圖嘅10/20線，槓桿有約49.8倍，為同一收回價中第二最高、活躍嘅熊證。
作者阿珊，以技術分析玩輪證，唔貪心，努力賺取我家肥貓罐罐( Φ ω Φ )。
8月1日起一連四個星期六喺Patreon有個《短期課程》，教你最基本嘅技術分析同點樣拉線畫圖，學識自己睇走勢圖，幫自己搵支持/阻力/買入/賣出位，詳情請往Patreon搜尋「cbbcwar」。
