輪證贏家丨冷吼日經Call揀多成交圍爐

今朝揀咗隻恒指牛(57838)出嚟，都仲見到指數企高於5分鐘圖嘅10線，(57838)小注出動借10線上嘅話，都可以hold得到去下半場嘅，但呢一注就真係遲咗開，平均執到嘅格仔數扣埋手續費嘅話，應該都係打個和。

如果隻恒指牛(57838)Hold到過夜嘅話，今朝見指數開升81點，齋睇點數好似無乜特別咁，但重點係指數再踩到上熊證第一層街貨之餘，有再迫近重熊區26500至26599點。

本來諗住出好倉往重貨熊方向走，仲喺5分鐘圖等過第一粒燭出完下影線，以為嗰條線係已經高開低走咗，好倉都掟咗出去之後，指數跟手快速向下沉咗成100點，5分鐘見今朝嘅開之市裂口都補，明明綠燈轉眼變成紅燈，好倉第一注好難唔敗走避一避先。

望望鐘仲有11分鐘就到10點，暫時有見指數定於26400點呢個位附近，呢個位係噚作戰室日出好倉時望住嘅上方目標，雖則話街貨VS技術分析多數都係前者勝，但亦都有見過企住喺重貨前面一層都唔再打入重貨位去殺。

港股上到呢個位或都連佢自己都要諗下點玩。眼見隔離韓股、日股都創晒新高，真係有種恨鐵不成鋼嘅感覺。

韓日兩者秤日，皆因香港有N225嘅輪可以買得到。日線圖上有見指數於今日保持處於高位，60000點近在只咫，「圓底」頸線亦已經上破咗，保歷加底線向上有見將整條保歷加通道扭向上行，咁變相要小心Slow STC(14.3)兩線於超買位出觸頂向下，股價一旦同步被搶下的話，咁就要睇住下方嘅10天線。

日經Call(10103)，行使價60000點，同現價得0.96%價外距離，博佢一爬到上60000點嘅話由價外即價內，可以食埋內含價值。

平時比較少睇成交，但冷門Underlying係另計，呢隻對比上嚟算是活躍，如果用相約條款嘅日經Call嚟比較嘅話，佢嘅槓桿同引伸的確係爭少少，但就當比少少槓桿同引伸嚟當係換成交圍爐啦。

作者阿珊，以技術分析專心玩輪證，唔貪心，努力賺取我家肥貓罐罐ฅ^•ﻌ•^ฅ。

想睇埋美日台股、金油匯幣ETF嘅玩法，請往Patreon搜尋「cbbcwar」；新書《風暴中的小資理財聖經》已於Google Boook Store上架，可免費試閱。