今日 11:23
噚日極高難度博隻Popmart(09992)淡倉，揀咗一隻熊(68148)同一隻Put(19191)純因小時圖高位「陀螺」出現。
以噚日Patreon出文時間為10點40分，如常用10分鐘時間去睇文的話，則於10點50分時再睇返個走勢圖，基本上小時圖高位「陀螺」都仲係度嘅，問題係下方條10線拎出嚟做目標嘅話，倒底會係股價向下落搵10線，還是10線向上搵股價。
Anyway，以10線為目標的話，喺下半場隨住恒指落到25000點嘅時侯，佢亦都到步，所以淡倉day Trade嘅順利完成；如果用Put揸過夜嘅，今朝開市升100點係有啲嚇到鼻哥窿都無肉，但見到隻labubu，好似得佢一個見紅咁，及至依家10點15分，股價有落到見312.6元，咁嘅環境，執咗啦，吓話?!
高難度動作做完之後，再睇返今日個市，唔知大家有無留意，其實恒指日線圖上呢條「上升通道」都真係玩咗好耐好耐，依家呢一刻「上升通道」底線同25000點差不多。怪不得下方24xxx嘅牛咁勇儲到咁；但呢啲無絕對嘅，點知佢邊時邊刻等錢洗，係咪先。
換個小時圖睇吓有無得做Day Trade，暫時亦都只係見指數於小時圖嘅10/50線之間游走中，作戰室都係借緊五分鐘圖嘅保歷加通道爬緊格仔架咋。
簡單啲，今日就當完成噚日嘅popmart淡倉，跟住Happy Friday去朝聖買隻labubu啦，好嗎?!
作者阿珊，以技術分析專心玩輪證，唔貪心，努力賺取我家肥貓罐罐ฅ^•ﻌ•^ฅ。
直接去Patreon搜尋「cbbcwar」領取七日免費試用即市作戰教室
