【輪證贏家】恒指熊打無限肥牛城

噚日揀咗隻恒指熊(66167)出嚟，係諗住用嚟向下衝落去重牛無限城，只不過喺出文時見五分鐘圖都有似落完一浸咁，所以先mark住等一等五分鐘圖重新行到Swing之後先至出倉。

呢一等就真係等足半場，臨完場前5分鐘見Slow STC(14.3)兩上到超買位；及至下半場開市後10分鐘，見Slow STC(14.3)嘅%K線低走於%D線，再比多5分鐘時間就確認兩線觸頂向下兼離開超買位，(66167)出場。

Swing Trade一趟大家都識玩架啦，持貨至1點55分時見Slow STC(14.3)兩線都落到去20以下嘅超賣位，直至3點打後見Slow STC(14.3)兩線都上返20以上，即離開咗超賣位，(66167)就真係唔留啦。

變相之前嗰一段時間都係(66167)完成Swing Trade後可以走貨嘅時間，拉到最盡兩個鐘嘅呢一注Trade平均有4格或19.51%正數落袋。

噚日臨收市前見五分鐘圖Slow STC(14.3)兩線上到超買位，喺作戰室都有同大家開可以出注淡倉博過夜。今朝一開市見指數向下跌百零點，睇上去好少係咪?!但重點係佢已經將第一層嘅重貨牛25000至25099點全數收回，(66167)如果你有過到夜嘅話，依家9點36分，我諗你已經數緊錢。

開市後指數向下再穿過24900點，變相指數將首兩層牛證街貨都收回，有逾2000張期指街就咁就無咗。

的確係諗住指數會繼續再向下殺過去食埋24700至24799點嗰層過千張期指街貨，但喺五分鐘圖上第一粒燭即出下影線，睇定啲派嘅戰友偷步出咗好倉/等再多少少訊號見低開高走確認先出好倉，至依家2分鐘後10點，指數已經重新爬返上25000點樓上。

喺跌市中出好倉個感覺其實同偷食應該差唔多，喺未被淡友發現之前食咗嗰種刺激感唔係純綷贏錢咁簡單。

不過，喺呢度好難同大家一齊咁樣偷食，唔係我唔想，係時間唔容許。

10點打後有見指數喺五分鐘圖上去到10線前止步，25000點呢個位都估到佢要打一打，不過確實下面嘅無限肥牛城，的確係會令到淡友殺到眼紅。

恒指熊(67856)，收回價25400點，同現價有約400點距離，係安全貨但想再保險多少少嘅係，等一等指數喺小時圖上如果撲返上100/150線多一次嘅話，咁(67856)先至出場，少少彈高熊mode啦，鬆一鬆埋條Slow STC(14.3)之餘，順便借埋條向下嘅保歷加通道，睇吓仲殺唔殺多少少。

作者阿珊，以技術分析專心玩輪證，唔貪心，努力賺取我家肥貓罐罐ฅ^•ﻌ•^ฅ。

直接去Patreon搜尋「cbbcwar」領取七日免費試用即市作戰教室