1月28日 10:15
今日係年廿九，由於無年三十嘅關係，所以港股今日半日市後就正式收爐，至下個星期一(2月3日)開市。至於內地A股其實由今日開始放到下個星期二(4日)，即係下星期三(5日)先至開市，所以啲南北水就要下個星期三先至通返。
「吓?!無咗南北水港股咪又水淨鵝飛?!」咁又未必喎，事關嚟到呢啲農曆新年日子，大家都會拎返啲傳統出嚟，其中一個玩法就係開紅盤，即係博過完年返嚟開市嗰口價係升咁解(以前就玩足過年後嗰一日嘅，但唔記得由幾時開始只係玩完U之後嘅開市價啫)。
玩呢個遊戲好簡單，只要出一注打靶都肉赤嘅注碼+抱住一個中六合彩頭獎嘅心態，喺過千隻恒指牛或過百隻嘅恒指Call裏面揀一隻，今日中午收市前入貨，That's it！
坐幾日貨或者好多人會傾向輪Call，因為無打靶機制，唔怕過年之後返嚟有咩事一開即啪無仇報。呢個諗法係無錯嘅，不過Call(或者輪)有一樣嘢叫做時間值損耗。
呢個時間值係跟住隻輪嘅到期日而出現，即係佢一出世就有呢樣嘢；同時亦唔會因為港股放假而停止計算，因為日子係有過住嘅，咁所以農曆新年嗰幾日假期佢都有時間值喺度，所以如果要揀嘅話記住唔好揀末日輪，就好似今日新上市隻(13310)，喺附近行使價嘅Call佢係7月到期嘅「綠洲」，其他都係2月或者3月到期(放完假返嚟都2月啦，所以2月嘅真係唔好揀)，(13310)行使價為20600點，同現價有大約1.96%價外距離，屬輕微價外Call。
至於揀牛證嘅話，的確佢係無Call受時間值問題影響得咁緊要，甚至可以話無乜時間值影響，因為佢另一樣嘢係輪無嘅，就叫做收回價，安全嘅梗係揀隻遠牛無咁易打靶先啦，以依家9點56分見指數做緊20267點計，揀同現價有大約600至700點都真係夠安全，好似恒指牛(68044)，收回價19600點，同現價有約660點距離，槓桿約27.8倍為同一收回價之中最高，街貨8%鬆啲唔多架啦。
蛇年快樂！初六見！
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰教室七日免費體驗：https://www.patreon.com/join/cbbcwar
