12月9日 14:36
啱啱嘅星期六晚，舊同事+圈內人傳出一個消息，指我前前公司嘅「老闆娘」Ms. S已經離開咗。還記得以前舊舊公司仲係喺香港區時，食完飯間中等𨋢會見到佢，同埋CFO，一啲架子都無。
由於我係屬於雜誌嘅財經組關係，而老總每次公司業績都係派我出去，可能因為咁所以變成同CEO、CFO佢兩個特別「熟」。
11年前嘅年底係我離開舊舊公司嘅時侯，唔知有幾多人辭職派散水餅散到上去高層？我有，CEO同CFO當時知我離開雜誌去做Online之後，記得佢哋揀完件餅之後同我講：你喺出面學完之後要返嚟幫我哋手呀！我仲好爽快咁答你：好呀！
傳咗兩日嘅消息幾唔想相信都總要接受，「老闆娘」：如果你同CFO都仲記得呢個「承諾」嘅話，下一世要我做返記者又有乜所謂呢，但最重要嘅係你記得請我返入去做呀！
喺我仲未開始下一世之前，我要努力地揀好啲盤同增加我嘅知識，到下一世嚟到嘅時侯會變得更強！
所以，睇返個市。今朝揀咗隻恒指牛(62971)出嚟，由於出文嘅時侯已經見到5分鐘圖嘅Slow STC(14.3)都已經上到超買位，所以都講定一係等指數喺5分鐘圖踩住線見有支持先至出動；一係就索性等Slow STC(14.3)確認於超賣位出觸底先至出動。
喺今朝上半場11點40分左右，見到5分鐘圖嘅Slow STC(14.3)兩線於超賣位上%K線終於高走返條%D線，不過要去到臨完場前5分鐘見至確認得到Slow STC(14.3)兩線出觸底離開超賣範圍。當然，如果進取啲嘅話，一見數字出觸底走勢就即刻掟好倉爬下格仔啦；但呢啲動作好難喺文章裡面做，因為隨時文都未出已經完成一趟。
按返策略做嘅話，一如以往的用用10分鐘時間買隻(62971)的話，按期內高低位做過0.045元/0.042元，平均買入價為0.0435元。
下半場半市至依家都未有半個鐘，有見指數同Slow STC(14.3)齊齊向上行嘅，不過上行嘅動力又真係無下半場咁高，同時見到整條保歷加通道整條向下兼通道口有收窄，安全起見(62971)如果上唔到中軸都好閃人。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰教室七日免費體驗：https://www.patreon.com/join/cbbcwar
