4月18日 13:26
今朝揀咗隻恒指牛(50110)出嚟，以今朝出文時間10點13分計，如常的用10分鐘作為睇文時間，即於10點23分再睇返走勢圖。當時指數喺五分鐘圖上同條10線係愈行愈遠，完全無辦法等得到佢靠返條線之下唯有直出隻(50110)。
如常的用10分鐘作為買入時間的話，以10點25分起計10分鐘入隻(50110)，期內(50110)高低位做過0.058元/0.054元，平均買入價為0.056元。
落場後指數一直係咁上，16400點輕鬆過關之後，指數仍然未掂到10線，順便喺小時圖上過埋中軸線。再去到10點50點，16500點亦抵壘，惟同步於10點55分高位同見16507點，「平頂」出現之下指數於高位稍回，及至11點20分確認失守10線，Slow STC(14.3)兩線觸頂向下，換埋保歷加通道亦見通道口收窄，發動Swing Trade條件嘅技能都出現晒囉，(50110)唯有走人。
同以10分鐘作為走貨時間，於11點20分確認失守10線起計10分鐘，期內(50110)高低位做過0.062元/0.059元，平均走貨價為0.0605元，換之言呢一趟一個鐘鬆啲嘅好倉注，平均有4.5格或8.04%落袋；戰友們今朝10點未到已經出咗好倉啦，午前見保歷加橫行返，指數喺中軸都守咗好耐，有部分戰友率見收割保正數，啱呀，不過我相信都仲有貪心鬼嘅。
今朝睇新聞時見天文台都話呢幾日會落雨，中午未到幾個雷打過嚟，我家肥貓由佢平時瞓係窗台位爽爽的，即時被個雷嚇到跳落地，急急腳走過嚟我做緊嘢嘅檯底嗰塊爪爪版度暱埋，陰功，你話出面啲浪浪咁算？(佢曾經都係一隻浪浪)
下半場開市嘅同時，天文台發出今年首個黃色暴雨訊號，黃色啫，OK嘅，不過出去食飯嘅話，除咗帶定把遮之外，如果公司有對拖鞋嘅話就換定啦(我以前真係有對人字拖喺公司架！)
作者阿珊，以技術分析專心玩輪證，唔貪心，努力賺取我家肥貓罐罐。
Patreon新增內容《開市前速報》，七日免費試用：https://www.patreon.com/join/cbbcwar
