1月8日 13:25
今朝恒指完咗開市前U盤，報出第一口價之後，由五分鐘圖至小時圖開始度過去，見到五分鐘圖上嘅100/150線，同埋小時圖上10/100/150線，總共五條線都處於差唔多同一水平，都係見1659X點呢個位。及至恒指開市後，首五分鐘都Chok得快又大，過後終於見指數有方向，喺五分鐘圖見低走於50線之下，基本上第一注以爬格仔為主嘅淡倉都可以出動。
而喺呢度，今朝揀咗隻恒指熊(64910)，由於出文時間已經係10點18分，當時喺五分鐘圖上已經見到Slow STC(14.3)已經出緊超賣再超賣，再追落去的話，保歷加通道口一定要保持拓闊先至可以有位再落同Keep到超賣再超賣。而向來喺呢個專欄用開小時圖做Trade嘅話，喺10點至11點期間其實已見小時圖Slow STC(14.3)兩線落到超賣範圍，不過保歷加通道口仍然拓闊中，借小時圖而出(64910)的話，如常按以10分鐘作為睇文時間，即10點30分至10點40分期間落場，期內(64910)高低位做過0.054元/0.049元，平均買入價為0.0515元。
落場後都有擔心過指數會唔會已經跌完，呢注淡倉最終可能只係執幾格完事。估唔到喺11點10分左右，指數忽然向下再落，穿埋16200點，正正式式將牛證重貨區全數收回，而今日上半場計，恒指將牛證首三層街貨全收番晒，呢三層總數有相當於2532張期指街貨，飽到呢。望望中午恒指收報16197點，跌334點，半日成交額見479.07億，好似比上個星期多返少少。
及至下半場開市之後，見指數都仍然咬住喺低位徘徊，五分鐘圖上見保歷加通道變得窄窄的，喺11點15分時量度頂至底線高度只有80點，按中軸未過，則指數目前keep住喺中軸至底線嗰40點之間運行。再望望(64910)目前證價有0.058元，對比平均買入價有6.5格或12.62%落袋，怕悶/晏晝有會開/有客見/有仔湊/有囡湊嘅，率先袋咗個下午茶費事一陣悶得滯，鬆懈時被佢一下子彈高，無咁杯奶茶就唔抵啦。
作者阿珊，以技術分析專心玩輪證，唔貪心，努力賺取我家肥貓罐罐。
作戰室免費試：https://www.patreon.com/join/cbbcwar
