12月29日 14:28
話說今朝被恒指摑左一巴之後，喺9點50分左右見指數向下穿過五分鐘圖中軸，於是順勢再追出淡倉，結果即遇低位「長十字星」，右一巴比埋出嚟，指數反方向後過返中軸，呢一次無再反，因為兩次都係咁嘅時侯就決定罰自己今日停賽，至於隻淡倉...抱住「反正都係啦！」呢啖氣而頂到11點15分左右，指數慢過樹懶咁向下落返去遇上「長十字星」嘅低位附近，拉線唔過，蝕手續費下當自己執身彩。然後繼續罰自己今日停賽(齋睇唔買)。
上半場恒指跌76點，半日報16966點，有啲擔心今日出唔到個花花Filter，同步亦見五分鐘圖上指數保持目測低於25度嘅向下斜度方向運行，以半日收市口價計，剛好等同上文所講嘅「長十字星」低位。換保歷加通道見整條通道有向下運行嘅情況，午後一旦過底線，五分鐘圖100線(中午見16946點)同小時圖10線(中午見16925點)，或者係貼價熊證嘅下一個目標。
估唔到下半場一開市指數就一步到位，落到五分鐘圖100線/小時圖10線，計劃再比淡倉嘅都真係等過線先至比較安全；或者諗下嚟緊呢三日假期點過都得。可能後者嘅選擇仲好。
嚟到今年最後一個交易日嘅最後三小時，睇返今年全年只係用一個「跌」字去形容，週線圖上見恒指真係由年頭跌到年尾，自3月失守保歷加中軸之後，至今一直都處於保歷加下降通通。換平均線見指數有時借10線上上落落咁，嚟到今日週線圖今年最後一粒燭，以依家1點4分恒指做緊16974點計，都仲係受制於10線之下。保歷加通道口收窄又點，暫且見最多指數被佢迫返上中軸線前，隨時又會再向下落過；轉勢暫無期。
MPF都係唔好搬去港股度住啦。
作者阿珊，以技術分析專心玩輪證，唔貪心，努力賺取我家肥貓罐罐。
作戰室免費試用，詳見FB專頁：https://bit.ly/3uixP4Y
