12月12日 13:22
恒指今日似做返唔錯，指開高開後稍為向下落過一下，喺五分鐘圖上見指數借10/20線之下彈返上去見高位1632X點，Slow STC(14.3)亦好合作地Keep住喺天花板，似等保歷加通道口收窄完成之後，再同指數飛高高。
本身今朝揀咗隻恒指熊(62331)，就係打算吼保歷加通道口收窄時，指數同Slow STC(14.3)向下走一趟而出動。問題嚟啦，保歷加通道口有收窄，但指數同Slow STC(14.3)並未預期般出現Swing向下回落，下方10/20線一直頂住指數同Slow STC(14.3)，最終喺11點15分仲上破咗朝早切出嚟嘅頂線1632X點呢個位，推返指數升140至150點。
恒指呢口價的確係靠近返熊證街貨，16300至16399點為第一層熊證街貨計，指數仲踩住熊證街貨添。「但明明上面啲街貨比牛證少咁多，都仲要咁嘥力向上打嘅？」呀?!今日唔算好嘥力上，百鬆啲點啫，要求又唔好咁低，只可以話熊證出得比較貼啫。
坦白講睇住個市成朝，一開市好倉追出後Standby定隻淡倉等落，但都真係等咗好耐都未等得到，又咁講一日半日反方向走好難話佢係確認轉勢(得一粒燭真係唔可以話叫轉勢)，但承認噚日失16000點真係有啲震撼，今日推返高少少，會唔會等同酒樓一樣，先加價，後推特價孖寶？
今日計日線圖上嘅「下降通道」算佢過咗，不過都想借一借日線圖10線做上方第一站阻力線。市總係會彈而唔會一直向下，問題係去到邊個位咁解啫。
下半場返嚟到依家開咗市11分鐘到，見指數都仲喺高位徘徊緊，而下方中軸線今日都好似有啲力水，怕且等佢穿而確認觸頂出Swing再比淡倉變成有難度；之不過見中軸線有支持出好倉亦都有麻煩，事關指數實在行得慢過樹懶。呢啲先最煩，唔上又唔落，不過都係好事，至少有啲時間去檢視下到底個市係真心彈還是引牛入局。
明日家中有事，【輪證贏家】盡力處理，不過【輪證下半Part】就要暫停一日啦。
作者阿珊，以技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
