12月7日 14:04
今朝史無前例地【輪證贏家】喺10點都未夠就已經上咗文，但市要落係無人可以阻止，已經畫好晒圖，度好晒位，就係爭後一步揀貨，貨都未揀到，指數就已經跌低於16228點再創年內新低。
以今朝9點56分出文，如常用10分鐘作為睇文時間，即10點6分再睇返恒指走勢圖，當時指數已經向下落到16200點以下水平並有開始橫行嘅情況，本身揀好咗恒指熊(61949)出嚟，但五分鐘圖Slow STC(14.3)兩線已經落到地板，整條保歷加亦見向下，指數同Slow STC(14.3)亦要預咗佢哋會出觸底回升，還是乖乖地等Slow STC(14.3)上到超買時，如常的用返Swing Trade玩一趟算啦。
噚晚碌FB時，見到林本利老師嘅一個Post，林老師嘅Post好生動，手畫嘅一張圖再加文字，而噚晚以【金融廢墟】為題嘅Post，見林老師計算咗2019年8月底、2023年12月1日同2023年12月5日，即最近新增兩隻恒指成份股生效之後一日嘅恒指PE，喺三個數字中見到恒指PE係有下跌嘅情況，當然恒指本身點數亦有下降，但如果熟悉數理同恒指成份股變化的話，成份股數量今年比2019年係多咗，當時成份股總數只係得50隻，但如今已增加至82隻。明白受到疫情影響都會對收入以致盈利做成打擊，但圍數多咗32隻之下，恒指盈利期內累跌36.05%，而恒指PE則由10.21倍降至10.13倍，心知肚明被染藍的成份股嘅「成份」係啲乜。
喺大約11點40分左右，見五分鐘圖上Slow STC(14.3)兩線上到超買水平，不過(61949)呢個位出一來要預過Lunch，二來喺小時圖上見指數已經完成咗今朝預計嘅「小圓頂」，指數擺位放於底線之下，但未見再落，反正得番20分鐘完上半場，都係下半場開市後再算。
還好見指數呢幾日都係朝早出完全年低位之後，午後總有一小段時間係回升，下半場返嚟見指數於小時圖上重上「圓頂」底線之上，Slow STC(14.3)仲要出觸底之餘，保歷加通道口見收窄，(61949)要行埋一邊先，呢個時候安全嘅安心等待下一次出淡倉嘅機會，事關如前文所指，呢幾日午後稍為chok返上去之後，喺下半場隨時再見年內新低點，嗰啲上影線呀、唔過平均線呀、保歷加通道口唔拓闊呀、高位出「十字星」甚至「射擊之星」呀，好好地數住啦。
作者阿珊，以技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
