12月5日 13:38
今朝恒指完U後低開39點，報出嚟口價見16606點，到正式開市後又再上濱屢創年內新低，再來淡倉恒指熊(61654)應戰，以今朝10點21分出文，如常的用10分鐘時間睇文，即於10點31分再睇返個市，五分鐘圖上見剛好指數被10線壓住，(61654)亦可以出動。
以10點30分起計10分鐘作為買入時間的話，期內(61654)高低位做過0.06元/0.055元，平均買入價為0.0575元。同樣地都係無Set到目標價，仍然如常地借10線唔過出倉的話，再次借返條10線作為量度線。
喺接近完上半場之前，指數稍為高於10線之上，其實以臨收上半場市前5分鐘見到呢個情況，快快掉走佢唔過Lunch亦係可以；不過呢度慣常用10分鐘計買/賣平均價，所以等睇埋下半場開市之後先至再計數(老實講見保歷加通道口收窄，好想借埋條中軸唔過繼續hold淡倉，但見Slow STC(14.3)咁囂張出觸底，都係見好就收算數)。
喺今朝篇文度嘗試用日線圖至月線圖拉黃金比率計計下一個底喺邊，實在是沒有辦法，日線圖用上年底位至今年初高位雖然拉到16509點出嚟，但呢口價兩三下手勢又被恒指隊穿埋；再落先係第一站見上年11月時出嘅上升裂口底部16138點，再落真係見16000點附近，皆因用到2008年低位10676點至恒指歷史高位33484點拉出嚟嘅就係16058點呢口價。
下行走勢的確預咗，仲要係預咗好耐，不過喺一條下降走勢裡面真係唔會只係得陰燭出現。望望鐘依家1點11分，恒指喺五分鐘圖上見已重上中軸以上水平，(61654)亦響起走貨訊號。以下半場開市後見指數企上中軸而走貨的話，期內(61654)高低位做過0.063元/0.061元，平均走貨價為0.062元，呢一趟大約用咗1.5小時(包埋Lunch Time嗰一個鐘)平均執4.5格或7.83%，扣埋飯鐘即係半小時執到呢個數，今日要多謝嘅係港交所(00388)，唔係佢接力落，指數都唔會又插咗多。
午後開市隔離屋收貨，小狗見有陌生人又吠到汪汪叫，不過我家肥貓已經懶理，總之唔係嚟我屋企嘅佢一律當佢透明。如同肥貓一樣，專注做好一件事就已經可以；睇下搵唔搵到多一個位可以再出淡倉啦。
作者阿珊，以技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
