2026年10月2日
美股周四反覆回穩，道指高開102點後，升幅一度擴大至273點，隨後轉跌最多359點，低見50546，收市道指報50926，反彈20點或0.04%；標指轉升15點或0.19%，報7666；納指微升10點或0.04%，報26871。市場靜待今晚美國周五公布9月份就業報告。
美國30年期長債孳息曾攀高6.14個基點，至5.69厘，創2002年以來高位，但其後一度轉挫5.6個基點至5.583厘；10年期債息一度倒跌10.4個基點，至5.207厘，日內則曾升至5.362厘，亦創2002年以來新高；對息口較敏感嘅兩年期債息最多降12.9個基點，至4.758厘。與此同時，英國30年期債息自1998年3月以來首次突破6厘。美國總統特朗普於《時代》雜誌訪問中表示，聯儲局主席沃什喺9月議息會議上應該投票反對加息，但唔會因為當局決定而責怪佢，又指聯儲局變得十分政治化，對沃爺並唔公平。
Google宣布推出期待已久的前緣人工智能AI模型Gemini 4 Argon，其母公司Alphabet股價一度漲2.7%，但收市倒跌1.7%。阿Man持有嘅GOOG死心不息，一心諗住可以企返條100MA大約係355，結果噚晚去到353又回頭，咁嘅情況下，阿Man又繼續留住啲GOOG。至於MSFT反而漸入佳境，開始企穩咗500樓上，下一步就係等埋上去550。META依家有啲尷尬，條10MA已上移至733，但又企唔穩，都係睇緊少少，今晚若然穿埋720，都係走先算，等20MA喺680-690先再買返。DELL都算係咁，均價大約543左右嘅貨持有，不過今晚若然仲係企唔返上550，都考慮減磅。INTC暫時未補裂口，唔補嘅話算係保持強勢。MRVL愈升愈有，防守可以推高去250。CRWV接咗86一注，82仲有個買盤未接到，78-80防守等下先。至於MU就博到個唔錯嘅業績，不過噚晚都叫反覆，阿Man之前喺1048買嘅貨，走咗1065後，再撈返個1055，但上唔到1100就喺1095落咗車，再擺咗個1025近條20MA同埋995近30MA睇接唔接到，結果1025又買返一半，收市又衝返上高位，今晚再睇下1100企唔企到上去。
MU份業績嘅最大亮點唔係542億美元收入或者377億美元淨利潤，而係「可預測性嘅質變」，320億美元客戶現金承諾、1500億美元RPO、2027年HBM產能大部分已鎖定，呢啲係傳統記憶體行業從未出現過嘅情況。MU有機會擺脫舊週期嘅估值折讓、正式向 AI核心基建股倍數靠攏。雖然唔少人都擔心美股位高勢危，但只要轉型AI企業都交到業績，所謂嘅AI泡沫未有耐篤得爆。今晚NQ個分水嶺喺30800，支持30700/30600/30500，阻力30900/31000/31100，暫時喺呢幾百點上落。
港股於假期前夕表現反覆，在9月及第三季最後一個交易日，恒指先跌後回升，恒指低開129後，早段一度跌190點見24332低位，其後輾轉回廿，最終全日倒升89點，報收24613，成交額則只有1871億元，北水在今日至下周三休假前，錄得淨流入68.64億元。不過當晚港股在夜期時段，卻跟隨美股走軟，盤中更一度跌穿24400水平，夜期收報24422，ADR亦回落至24400水平附近。至昨日黑期進一步回落，今早黑期未開市前喺24300水平徘徊。
恒指裂口低開513點，報24099，較假期前出現一個233點大型下跌裂口。由於開市直接跳空穿咗24250呢個重要支持，加上英、法兩國均因財赤陷入財政困境，市場盛傳英國可能提高銀行稅以減赤，大笨象(00005)跟渣打(02888)股價今早曾重挫逾5%，大市即失守24000關口，最多跌747點，低見23865後喘定，咁樣跌一跌，超過等同3000張期指嘅牛證全數被回收。恒指半日收報23964點，跌648點或2.64%。喺北水休市下，半日成交額839.6億元。牛證重貨區暫時就望返去23600，若然下周三北水休假期間，大市仍無法回補今日嘅下跌裂口，重返24300企穩，小心北水返嚟頂唔住減磅，港股順勢向下踩多腳。
麥狄文
(徐狄怡‧證監會持牌人)
