2026年8月5日
重型機械巨頭Caterpillar及大數據公司Palantir業績理想，加上美伊局勢有所緩和，國際油價顯著急回，美股道指繼周一刷出收市新高後，隔晚一度升超過1000點，首次升越54000，與標指齊創即市及收市歷史新高，標指首次升穿7700水平。美市收市，道指升907點或1.71%，報54085，連續兩日創新高；標指升136點或1.79%，報7736；納指急彈671點或2.59%，報26584。
Caterpillar季績勝預期，紓緩市場對向數據中心銷售發電設備前景擔憂，股價一度勁升12.6%，收市升幅收窄至5.6%，為表現最好道指成份股。相反，Nike回落2.6%，為表現最差道指成份股；Palantir股價炒高29.5%。SpaceX周二收市後公布上市後首份業績，業績公布前股價彈高9.4%，不過盤後則跌逾7%。話咗SPCX跌穿180可以不理，以為去到招股價附近有支持，結果直穿落到100邊先刹車，明晚股份解禁，似乎想入去炒都要睇定啲先，一直彈唔返上招股價，都幾濕滯。
講返阿Man個短炒倉，MU撈到靚位又驚死，結果開市硬着頭皮追貨868買返一注，暫時未企返穩900，但875條10MA就叫企咗，都係睇住嚟做，至於NBIS同樣硬追221，叫做蝕抵咗3蚊照追，估佢唔到212條5月線企定定，又上返車睇下有冇上返250樓上。DELL阿Man識得喺394同403低位撈貨，但435食完一轉又遺忘咗，明明喺個watch list上面，等到開市上埋450先如夢初醒，追返一注452，一下買貴接近廿皮，但噚日都無追錯貨，暫時睇住個450做防守。今晚目標係INTC，唔穿95搵位上車，防守90。
亞馬遜創辦人貝索斯申報減持1500萬股，涉40.7億美元，拖累股價逆市跌2.3%。不過股價企硬條5MA即260左右，呢個都只係一個小小調整。MSFT穩步向上，暫時用470做個止賺參考，388嘅短炒貨已經贏超過一嚿仔美仔，企得返上500，自然貪心想望返52周高位。至於NQ噚日可以話係報復式反彈，噚日下午歐洲佬瞓醒，個NQ企到個29000之後頭也不回，其實NQ真係跟住個分水嶺嚟做無死，結果最高逼近30000先回頭。今晚NQ個分水嶺較上日升咗1000點，去到29800，支持29700/29600/29500，29500條50MA係關鍵，再穿落返去就睇住29200-29300。至於上面阻力29900/30000，企得穩30000，就再睇30100/30200/30400。
城堡證券股市和股票衍生工具策略主管Scott Rubner表示，散戶投機交易降溫後，市場正從資金主導環境，回歸到由盈利、企業需求及宏觀背景為主環境，目前推動牛市因素仍穩固。該行數據顯示，散戶上周拋售美股為2022年以來單周最多，主要集中於科技股。究竟啲科技股係反彈定係調整完成，睇多幾日自有分曉。美國10年期債息曾降7.3個基點，至4.611厘。美滙指數一度升0.16%至100.06，其後反覆偏軟；日圓回落0.5%至157.96兌每美元。
港股昨日先升後回，恒指高開81點，早段一度升至26187點高位，可惜無以為繼，其後更一度考驗250日線，低見25768，高位回落逾300點，但250日線見支持反彈，最終跌幅收窄至156點，收報25852，穩守於250日線之上，但成交額縮減至2578億元，上升動力明顯減弱。恒指昨日日線出現穿頭破腳利淡形態，不過至夜期時段，夜期隨美股顯著上升而反彈，夜期重返25900水平之上，今早黑期亦穩守於25900水平之上，恒指高開38點，淡友即發力，大市掉頭向下，最多跌123點，低見25729考驗250日線，不過好友威足成個7月，又點會咁輕易罷休，反攻再將恒指向上推進，最多升115點，高見25968，不過阿Man都提咗幾日，市寛背馳，加上未做到價量齊升，26000資金相對審慎。恒指於25900水平爭持，半日收報25881，升28點或0.11%。大市半日成交1429.69億元，北水雖然仍錄得淨流入7000萬元，但顯然入場資金買少見少。
恒指能否重上26000關企穩，再向上挑戰26300/26500/26800阻力，抑或回踩下方支持25700/25500/25200，暫仍屬未知數。不過目前恒指正處於由1月高位延伸至今之下降軌頂部，及由6月低位反彈至今之上升軌通道之交滙點，要再向上突破必要連續企穩26000收市超過三個交易日，相反向下展開調整，則要確認跌穿25700收市超過三個交易日，方有較明顯方向。目前，好淡雙方於25700-26100之間角力，但暫時反彈升勢仍未結束，只處於高位整固。值得留意美股方面，AI相關股份再度回勇，如給引資金回流，可能再出現老登股回落，新科技股熱炒狀況，反而不利港股繼續向上。
麥狄文
(徐狄怡‧證監會持牌人)
