2026年5月7日

盤房來料丨港股再破頭肩底頸線惜成交未配合

美股周三顯著上升，道指一度抽高超過700點，一度重越5萬關，美市收市，道指升612點或1.24%，報49910；標指升105點或1.46%，報7365；納指升512點或2.02%，報25838；標指跟納指再創歷史及收市新高。

投資者憧憬霍爾木茲海峽全面重開，恢復運輸供應，國際油價急跌，紐約期油一度插水13.31%，每桶低見88.66美元，但今早亞洲時段則重返95美元水平之上。Nvidia宣布與特殊玻璃和光纖生產商康寧(Corning)達成合作協議，以加強美國人工智能(AI)基建的製造能力，康寧股價急升12%，Nvidia升5.7%。NVDA股價暫時企埋上去200美元之上，有貨嘅持有先。INTC同MU噚日叫咗減磅，MU最高去到685，話咗逼近700估值已高，INTC未過到120，食唔食糊自己決定。TSM去到400抖一抖，噚晚又再創420新高，仲有一半貨喺手，止賺位可以拉高少少去390-400。至於ALAB去到235附近回頭，盤中去過204低位又死唔去；CRWV同NBIS防守位分別推高去120同170，總之繼續持貨就推止賺位。

美股呢輪急升，如入無人之境，破頂唔估頂，但亦要防高處不勝寒，但已減咗半貨套利，進可攻，退可守。目前市場憧憬美伊停戰，若然雙方能真正達成協議永久停戰，海峽重開油價回復正常水平，解除通脹威脅嘅話，美股又真係可以繼續gogogo。NQ破頂變日常，噚晚開市後個28250分水嶺影都無，最低只係見過25350左右，第一個阻力區一企穩，就借美伊或永久停火嘅消息一路挾上去，盤中最高去到28800回頭，喺亞洲時段落到28600水平附近見支持。今晚NQ個分水嶺28650，支持28550/28450/28350，阻力28750/28850/28950-29000，其實啲阻力位都係得個估字，反而28000呢個大位由之前阻力，睇係咪變咗大支持，短線用返噚晚個低位28300-28350嚟做今晚個支持位。

中東局勢有所緩和，加上A股復市做好，港股昨日高開131點，雖然早段二萬六關一度得而復失，倒跌20點低見25877，但成功守住50日線即25800水平後，重拾向上動力再輾轉向上，最終以全日高位26213收市，升315點，北水回歸成交回復暢旺，成交額達3047億元。至昨晚夜期時段，再有報道指美國與伊朗將就結束戰爭達成協議，美股三大指數顯著上升，標指與納指再創新高。投資者憧憬霍爾木茲海峽全面重開，恢復運輸供應，國際油價插水，紐約期油一度急挫13.31%，每桶低見88.66美元，其後跌幅收窄至7%左右，美國收市報95.08美元，至今早亞洲時段，紐約期油約於96美元徘徊。

港股於夜期及ADR隨美股做好，今早黑期升至26500水平，亞太區內股市全線向上，恒指高開高走，高開317點後，升幅一度擴大至428點，高見26642半日高位。其後升勢略為回順，半日恒指報收26623，升410點。不過成交額1657億元又真係唔多配合半日嘅升幅，北水錄得淨流出22億元。

過去幾個交易日，恒指日線保力加通道一直收窄，而5、10及20日移動平均線接近滙聚於26000水平，三線滙聚區26000將成為短線重要好淡分水嶺，而今早大市裂口高開，至26531，不僅重返大型頭肩底嘅頸線位置26500水平，更一躍而至日線保力加頂部，由於今日港股裂口高開，唔排除急升後有機會短線回補部分裂口。即使短線回補部分甚至全個上升裂口，只要26000水平守穩，港股後市仍有機會保持向上，如能企穩26500即頭肩底頸線，料將展開新一輪升浪，先往上挑戰26800至27000水平。

麥狄文

(徐狄怡‧證監會持牌人)