2026年5月5日
噚晚美股偏軟，據報一艘美國軍艦遭兩枚導彈擊中，另有一艘南韓公司運營船隻遭到攻擊起火，阿聯酋一處石油工業區亦遇襲，三名印度公民受傷，消息刺激國際油價回升，雖然美國官員否認有關襲擊消息，但美股周一仍借勢調整。道指低開82點後，跌幅擴大至最多586點，低見48913，收市仍要跌577點或1.13%，報48941、標指從紀錄收市高位一度回落0.77%，收市跌29點或0.41%，報7200；以科技股為主嘅納指曾彈0.38%，之後最多倒跌0.8%，收市跌46點或0.19%，報25067。
不過個股表現又唔係差，AMZN逆市升1.4%，為表現最強道指成份股，手上仲有三分二貨，暫時270美元又企返，防守位250又守到。ALAB以205減咗180補嘅貨，185另一半補嘅貨，守到200又再等下先。CRWV再升逾5%，更升越125美元食糊位上方，127減咗回補嘅一半貨，另一半將防守位調高去115再睇下點。NBIS同TSM留返一半貨絕對正確，兩股都逆市升，前者盤後高見178創新高，今年目標係180至200，穩步邁向目標範圍。NFLX繼續發吽逗，但守到90美元，唯有再坐一會。NQ噚晚果然係27600由阻力變支持，27500影都無，但28000呢個位前面又真係有阻力，今早亞洲時段大約喺27750-27850之間上落，今晚點發展都係睇下美伊雙方又出乜嘢口術。NQ今晚個好淡分水嶺27800，支持27700/27600/27500，阻力27900/28000，都係睇28000呢啲大位，無咁容易一下打爆企上去。
中東連串事件令緊張局勢再現，國際油價回升，美股周一晚回軟，拖累夜期及ADR跌逾200點，預期今早港股低開，再度失守26000關，破壞本來5月良好開局。恒指噚日高開361點，早段升幅曾擴大至549點，高見26326，但午後升勢回順，升幅收窄至319點或1.23%，報26095點，不過北水缺席下，成交只有1769億元，反映沽壓唔算太嚴重，亦同時反映昨日升勢嚟得有點虛，可能係缺乏北水下嘅挾升，加上夜期及ADR回軟，港股又回復日升日跌嘅反覆上落格局，目前未有動力向上突破。
今早恒生指數低開150點，開市價25945已經係半日高位，早段一度跌405點至25690半日低位，中午跌302點或1.16%，報25793；國企指數跌109點或1.25%，報8664；科技指數跌90點或1.82%，報4885。半日成交645億元，北水缺席下，買賣兩閒。加上中午大笨象(00005)出業績前，缸邊友按兵不動。
中午大笨象業績公布，首季業績遜預期，暫時黑期反映下半場開市有機會跌返去今朝低位，雖然大笨象除稅前利潤意外倒退1.13%，但管理層表示，有信心集團喺2026/2027及2028年嘅平均有形股本回報率可以達到17%，或者更高，估計股價就算因為呢份季績有回吐，亦唔會插得好勁，估計條50日線大約135元會有一定支持。至於恒指要留意25600呢個位，大約係條10周線，相信有一定支持。目前個市喺50日線約25800上面兩三百點行住先，明日北水回歸，即管睇下北水會唔會喺26000樓下呢啲位又出手掃下貨。
麥狄文
(徐狄怡‧證監會持牌人)
