2026年4月2日
雖然美國總統特朗普表示要等霍爾木茲海峽重開後先會停火，但市場仍憧憬與伊朗戰爭接近尾聲，美股周二收市急彈逾千點後，周三延續反彈。道指收市升224點或0.48%，報46565；標指彈46點或0.72%，報6575；納指上揚1.16%，報21840點。隔晚紐約期油一度回落4.81%，低見每桶96.5美元，市場仍注視特朗普今早香港時間9點就伊朗戰爭發表演說內容，結果佢發表講話後，紐約期油回升至105美元，主要係侵侵並未有畀到一個明確撤兵日期，市場再度擔心戰事難以短期內結束，原油供應無咁快會恢復正常，油價自然再回升。
摩根大通行政總裁戴蒙向霍士新聞表示，美國要永久消除伊朗嘅任何威脅，如果達唔到目標，市場及全球經濟都容易受到衝擊，又指所有人都希望霍爾木茲海峽航道暢通無阻。而富國銀行將標指今年底目標從7800點降至7300點，理由係伊朗戰爭對經濟及市場已構成損害，限制美股潛在升幅，目標價較周二收市只有近12%升幅。
至於美股噚晚雖延續反彈，但今朝畀侵侵咁搞一搞，唔少股份喺盤後又插水，加上明日美股假期，唔少人都傾向減貨減風險，個NQ喺亞洲時段又單邊係咁插水，由24200水平一路插到23800水平暫時。睇嚟喺假期前，都係審慎少少好，噚日見開市ALAB同ONDS都未到位，未有撈貨，家陣再望返盤後就兩股都已到咗撈貨位，但畀侵侵咁講一講，今晚都係睇定啲先算。今晚NQ好淡分水嶺23800，支持23700/23600，阻力23900/24000/24100/24200。估計個NQ喺23600會有一定支持，其實由侵侵今朝發表講話後，個NQ由24200回咗成400點去23800，估計去到23600點都有支持，至於反彈呢24000或者已有阻力，上唔返24350，條20日線一日唔企返，NQ都係偏淡。
各地股市於2026年第二季開局都有個好開始，中東戰火有望平息，港股昨日裂口高開569點後，一度升641點見25429高位，不過20日線約25372未能企穩，全日報收25294，升505點或2.04%，成交額2914億元，以長假期逼近嚟講，接近3000億元成交已相當唔錯。雖然中東戰事有望平息，油價曾回落至100美元之下，但要恢復正常供應，必需要霍爾木茲海峽完全通航，估計仍需一段時間，暫時油價仍處於高水平，對通脹仍有威脅。
美股周二報復式反彈後，昨日升勢持續。但今早香港時間9點正，特朗普將就美伊戰事發表全國講話，令各地市場嚟個反高潮，因為侵侵唔單止無明確表示個撤兵時間，仲話要再炸多伊朗一陣，市場擔心伊朗及整個中東嘅石油設施被毁，將嚴重影響石油供應，到時通返個霍爾木茲海峽亦無用。一旦油價維持高位，對全球經濟必有負面影響。
恒生指數低開39點，跌幅隨特朗普講話持續擴大，無法企穩250線之餘，更重返250日線之下，午後如再考驗5日線及10日線即25900至25950水平，一旦再失守24900，跌勢或加劇。恒生指數需企穩20日線，並突破由1月高位延伸至今下降軌通道頂部即25300水平，方能完全脫險。短線大市於25100-25150約250日線為首個支持，下方支持為24950-25000/24800/24500。阻力方面，上方首個阻力為25500/25600/25700，而25800/26000阻力更大。至於大市要重拾升軌，則要修復所有移動平均線，即重返50及100日線，即要突破26200阻力，亦為目前日線保力加通道頂部，方有望重展升浪。
麥狄文
(徐狄怡‧證監會持牌人)
