今日 14:13

盤房來料丨國際貿易不明朗因素增 避險情緒再升溫

美國最高法院裁定特朗普對等關稅不合法，令貿易政策不明朗，市場重現「賣出美國」交易，美股周一捱沽，三大指數跌逾1%。道指低開89點後，跌幅擴大至最多894點，美市收市，道指挫821點或1.66%，報48804；標指跌71點或1.04%，報6837；納指跌258點或1.13%，報22627；反映中國概念股表現的金龍指數回吐0.95%，報7478。市場憂慮美國貿易政策不明朗，避險情緒升溫，需求帶動下，金價重上5200美元水平。

雖然市場對於特朗普五時花，六時變嘅做法早已習慣，但不明朗因素困擾下，市場資金避險，喺股市減磅亦係人之常情。值得留意係科技股已經跑輸傳統股一段時時，納指波動區間亦正下移，由之前24800-26100左右，下移咗去24200-25500。噚晚道指都有一個比較顯著回調，道指大支持位喺48000，呢個位不容有失，否則美股整體嚟講，可能會出現較深度調整。NQ今晚分水嶺仍然係24800，下方第一個支持24700，較大支持24600/24500；上方首個阻力24900，較大阻力25000-25100。

個股方面，噚日提到嘅CRWV急挫後反彈，噚日盤前先有上車位，開市無耐已反彈，重返90美元水平，有盤前上車嘅，繼續用80-82美元做防守，暫時目標都係100-120美元。如果錯過咗CRWV，就留意下SOFI，調整至現水平，估值開始合理，可以吼位17.5-18.5元上車，100周線16美元會有唔錯支持，目標先睇返20至22美元。

美股下跌拖累夜期跌穿27000關，今早黑期於26900水平徘徊，恒生指數今早低開168點後，一度挫558點，低見26523，半日跌523點或1.93%，報26558，如下半場跌勢持續，估計有機會考驗50日線，大約喺26450睇有冇支持。國企指數跌190點或2.07%，報9007；恒科指數跌127點或2.36%，報5258。半日成交1386億元，北水回歸反而今朝開市就沽貨食糊，港股又返去接近月初低位。

雖然最新關稅消息對經濟影響唔會即時浮現，但目前已開始有企業向美國政府提出起訴，要求退回被收取關稅，國際貿易形勢開始變得更為複雜，料股市走勢更為波動。美國方面，Nvidia將於周三公布業績，料為市場焦點，亦將左右科技股走勢。下月內地舉行人大會議，市場難免對此有憧憬，但估計大市亦未能藉此向上作出突破，港股短期或繼續區間上落。短線恒指於27200-27400阻力甚大，除非企穩27400之上，否則港股仍未扭轉上落市調整格局；下方則以26300-26400為短線支持，一旦跌穿26300水平，則有機會回試上月低位。若然美股嚟個較大幅度調整，港股甚至可以跌穿上月低位，考驗250日線約25000水平亦唔係無機會。

麥狄文

(徐狄怡‧證監會持牌人)