2026年2月2日
上周港股於周三及周四，連續兩日創下四年半新高至周四高位28056，但至周五顯著下跌580點，並貼近當低位27384，以27387收市，雖然按周仍升638點及2.38%，但至夜期時段，期指一段跌至27081低位，收市反彈至27330收市，但ADR及今早黑期則跌穿27300水平，今日大市低開。
港股2月開局受壓，恒生指數低開289點，低開低走跌幅持續擴大，半日最多跌665點，半日接近上半場低位收市，跌656點或2.39%，報26730。國企指數跌252點或2.71%，報9064；恒科指數跌210點或3.67%，報5508。半日成交1781億元，暫時沽壓又未至於好嚴重，留意全日成交如增至3000億以上，而恒指進步下跌至26500水平，即由12月低位25086延伸至今嘅上升軌底部，此關不容有失，否則進一步向下考驗50日線及100日線，約26200-26250水平機會極大，不過此兩線之前即使備受考驗，仍能守位令港股延續升浪，預期26200水平有一定支持。
美股方面上周五喺美滙指數急跌下，令人不禁聯想到近日最近全球興起「賣出美國」(Sell USA)交易，並將之與美元弱勢聯繫。事實上，美國總統特朗普有意用弱美元扶持當地經濟，投資者要對沖美元貶值風險，其中一個選擇就係買入黃金及白銀，故令金價及銀價早前急升屢創新高。不過，美元轉弱之際，美股及美債相對穩定，反映沽出美元唔等於賣出全部美國資產。雖然去美元化係全球新趨勢，但亦唔可能一步到位，美元亦唔會短期崩潰。估計今年各項資產波動性會增加，投資者要理性看待全球資產重估潮，好好管控風險。今早納指期貨NQ於亞洲時段低開低走，一度低見25216，曾跌穿100日線，暫時跌幅略為收窄，重上100日線。100日線料有爭持，如再失25300水平，下一支持為25000心理關口。今日NQ嘅好淡分水嶺25300，支持25200/25100/25000，反彈阻力25400/25500/25600。由於暫時美滙指數仍偏弱，現貨方面暫時無乜心水，反而等個市跌返定，或者今晚試埋25000支持，先吼位睇返MAG 7，到支持位守到就撈下貨。
至於黃金同白銀創新高後上周五急挫，白銀曾急跌三成，金價亦跌近兩成後反彈，但今早於亞洲時段再急挫，目前金價再跌逾5%，至4600美元水平。暫時黃金較大支持喺4500美元，4500美元博反彈，穿4450止蝕，博佢守住條50日線，大約係4480美元；至於反彈首個阻力為4600美元，下一阻力為4850美元，而5000-5050美元阻力更大。因貴金屬價格急跌，金礦股難免受壓，要觀望金價係咪50日線有支持。目前市場對獲提名為聯儲局主席沃什之政策取態仍不明朗，但地緣政治因素始終有利於金價表現，今年要有心理準備價將大坐過車山，建議短線先觀望，短線金價料於4800水平上下300點上落。科技股則要繼續關注本周美國科企公布業績，經過上月一輪升勢，下一個關注點為港股科企業績是否對辦。如一眾重磅科技股業績對辦，港股本輪調整如能守50日線及100日線，有望借業績期再展升浪。而最重磅嘅科技股之中，阿Man睇好騰訊(00700)，雖然今日跌穿600大關，日線圖唔係幾靚仔，用580元做防守，博佢業績前彈返上600企穩，業績公布如有驚喜，反彈目標635-650元。
麥狄文
(徐狄怡‧證監會持牌人)
