2026年1月20日
美國總統特朗普就取得格陵蘭管治權，宣布對派兵格陵蘭嘅歐洲8國加徵關稅，歐盟隨即考慮對美國徵收報復性關稅反制，消息令全球多個股市向下，港股亦難逃一跌。昨日恒生指數低開203點，早段跌幅一度擴大至311點，見26533低位。不過A股低開後回升，港股跌幅亦收窄，最終恒指跌281點或1.04%，報收26563，成交額2256億元，跌市成交減少，反映港股沽壓唔算大。至於歐洲股市昨日普遍下跌，而美股假期，道指期貨及納指期貨均下跌，不過港股於夜期市場則略為反彈，重返26600水平之上，今早黑期亦於26600水平之上徘徊。
雖然美股噚日假期，但發生咗咁大件事，道指期貨(YM)同納指期貨(NQ)當然會有反應，暫時YM跌逾400點，暫時喺49100水平；NQ噚日盤中曾跌穿25400，逼近25300水平，暫時喺25400附近，跌幅亦近300點。預期今晚美股都係低開，YM能否上返20日線企穩，係主導後市走向，YM條20日線大約喺49128。至於NQ之前一直喺25400至26000個range裏面，即係25400呢個range底不容有失，25454係條50日線嚟，穿嘅話唯有落埋條100日線25130尋找支持。留意返個VIX，即係波動指數上咗去19，如果呢兩日都仲唔落返18樓下，美股有機會嚟個大啲調整。NQ今晚睇住個25400為好淡分界線，上方反彈阻力25500/25600/25700，下方支持係25300/25200/25100，25100一定要守住，否則跌勢會加劇。
如果個VIX繼續上去20-23，美股嚟個大幅度少少嘅調整，咁就有機會買到GOOGL，TSM平貨。阿Man會吼住300-320美元嘅GOOGL，同埋300-320美元嘅TSM。至於MAG 7畀啲支持同阻力位大家，美股回調想買MAG 7就吼支持位上車，短炒去到阻力位就減磅。APPL支持244，阻力266；AMZN支持230，阻力258；META支持580，阻力650；GOOGL支持310，阻力350；MSFT支持428，阻力495；TSLA支持405，阻力475；NVDA支持176，阻力205。
雖然格陵蘭問題未有直接影響非歐洲國家，但特朗普是次舉動已摧毀美歐互信基礎，而北約變相形同虛設。如歐美再爆發新一輪關稅戰，等同向全世界發放一個訊息，所有關稅協定一旦有唔順從美國任何意願即可推翻，呢個結果會對全球貿易關係帶嚟負面影響，難免對股市帶來震盪。
至於港股方面，暫時27000料有較大阻力，雖然內地上周已減息，但卻同時調整融資比例，難免制約A股上升動力，港股或於短期內先作整固，又回復區間上落，上落區間約為26000至27000，靜待下一輪突破時機。暫時上半場恒指開26544後，反彈最高至26638無以為繼，又重返26600水平之下。由於噚日大市係裂口低開，暫未回補下跌裂口，若然一直受制裂口底部26741，日線圖就出現一個孤島形態，技術走勢上係利淡後市。不過極短線嘅RSI2，落到去10呢啲位，短線超賣下有機會有少少反彈，至於反彈阻力暫時係26750-26800，下方支持暫時係26300，下一較重要支持係26100。
麥狄文
(徐狄怡‧證監會持牌人)
