2026年1月7日
港股喺上周五2026年首個交易日開局就急升，至噚日由開局位約25700計，升超過1000點，終於今日半場就回吐，噚日講咗要睇住個26700，噚日收市叫勉強守住，今朝直接低開近百點，果然就落返去補裂口，一步去到26400-26500呢啲初步支持位，暫時勉強守住個26400。半日恒指報收26439，補完噚日個上升裂口26445-26498之後，就無法上返個裂口頂部，失守咗26500，連帶條頸線26535都失埋，剛好又入返日線保歷加通道頂部之內，係反彈至26800水平先回調，稍後再挑戰27000甚至去年10月高位；定係彈完做咗個反彈一頂低一頂，即係27381去年10月高位，再喺11月反彈到27188，事隔兩個月再彈到噚日嘅26858，繼續區間移動，咁呢幾日就要留意住個26700，同埋下一支持26300，大約係5日線。
若然受制26700，而再下破5日線，咁就有機會繼續行range，進一步落返去25800水平，又去返條20日線搵支持。相反，企得穩喺條日線保歷加頂26547，企埋條由27381高位延伸至今嘅下降軌約26700嘅上面，咁個市仍然有望挑戰27000同埋前兩個高位。以波幅嚟計，呢個星期成交大咗，以暫時只有大約600點周波幅嚟計，就唔係幾夠喉，做返800至1000點波幅就滿足周波需求。咁我會用恒指個26700，期指26750嚟做個分界線，企返上去，咪再挑戰27050-27250，做夠800至1000點波幅。如果三個交易日，恒指都企唔返26535，就有機會完咗呢一波反彈，又繼續行range。
個股方面，今日啲生科股逆市造好，主要係跟返美股噚晚熱炒呢個板塊，其由康方(09926)半日升咗6%，此股阿Man曾經喺聖誕節假期前於友報專欄作推介，當時提到喺約110-115左右收集，暫時到咗初步目標125-130元，只要企得穩125元，應有機會進一步挑戰130元，打破到呢個阻力，重上140至150元不是夢。至於今日不妨留意下中國光大(00257)，公司去年實現正自由現金流增加，首次足以覆蓋融資成本及股息派發，有利股息持續增長。而公司喺資本開支更為審慎，主要投向回報率高於國內項目嘅海外項目；以及A股雙重上市，呢啲催化劑有望帶動H股價值重估。現價買入，用返個4.5-4.6做防守，上面先睇個4.8-4.9阻力點先，企得穩就有望上返5.1，今年目標5.5。不過呢隻股一向係悶少少，博佢派息有返咁上下，4.5-4.6個平台有唔錯支持，估值有一定吸引力。
至於美股呢，噚晚又發力，市場單係炒減息呢個理由，足以推動道指跟標指再創新高。不過呢，納指仍然落後，雖然納指期貨NQ曾高見25935，但最終係回試返個25750-25800嘅前阻力位，呢個位睇下可唔可以由阻力變支持，暫時都係睇住25700，企得穩就睇高一線，企唔到佢無法突破，都係行range，短線NQ個range仍然係25400-25450，上面就25950-26000左右。個股方面，RKLB噚晚又急升咗一成，唯有等下80元有冇得上車。另外，畀多隻太空機站股ASTS大家玩下，但呢啲股波幅都勁，睇有冇回調到90元上車，至於目標就難定，因為資金一到位熱炒，單日升一成係等閒事，咁90元上到車，咪先睇有冇100元，短炒有一成利潤都唔錯。
麥狄文
(徐狄怡‧證監會持牌人)
