2025年1月23日
今日港股先升後跌，坊間普遍認為中央推動中長期資金入市措施、未有交代較具體金額數字，市場認為又係出口術多於實際行動，因此導致資金對中央信心問題下恒指才出現先升後跌現象。
美國真可一個打十個
擺在特朗普面前可能應盡快搞掂加拿大、格陵蘭與及收回巴拿馬運河主權、若能在上任短時間內得手就能揚名立萬，並且可以震懾歐洲、中國與俄羅斯等，到時氣勢更大並且可在國內壓低民主黨人的批評及阻力，在面對中國關稅問題上，其於上一任期內對華關稅近乎無功而回，在取易不取難選擇下現時仍未完成所謂「購物籃」內3件事前，就真真對中國動真格讓特朗普自己處於多面受敵？況且TikTok正被特朗普好友馬斯克或甲骨文提出希望收購，細心想一想會否出口術的不是中央而是商人性格的特朗普呢！若果幾日後未見中美開打關稅大戰，亦不要太天真以為天下太平，因今屆特朗普班子近全換上對華鷹派，只要特朗普攪掂好北美等方面事務，矛頭遲早必定會指向中國！
正所謂有危就有機
平心而論今日大市表現筆者收貨的，首先特朗普稱其政府內正討論2月1日考慮對中方加徵10%關稅，而未如當選前所謂一上場就即刻加徵60%關稅，既然對方只是牛刀小試難度，中央就要全盤計劃擺晒上枱面比人睇，況且幾日後是否真正加徵關稅仍未知，而真正開打關稅戰機率有幾高？暫緩關稅戰機率又係有幾高？可能後者略高於前者，反過來可能有危就係有機，今天盤中所見內險、內銀靚到爆，下午交易時段雖然恒指已告下挫，但內銀普遍仍保持股價於高位，亦見不少散戶身影願意追入，預計中央撐市之下高息股現時仍最為吃香，內險、內銀應該可以再坐一會。
梁健雄
筆者未持有上述股票
編按:作者梁健雄，香港財務策劃人員總工會司庫一職，從事金融業逾20年，曾任職多份報章包括英文虎報、南華早報、華爾街日報等後勤部工作。《炒股讀心》逢每周四跟讀者分享投資心理！
