2023年9月4日
上周五美國公布失業率，意外回升3.8，美股先高後低，道指升115點；標指升8點，納指倒跌3點。美股暫時喺高位整固，VIX回落至13水平，反映市場沽壓唔大，暫時美股唔似會大幅調整，反而係每次回調都見有買盤趁低吸納。當晚港股跟夜期都見反彈，尤其反映中概股表現嘅金龍中國指數升逾3%，港股喺新加坡黑期今朝重上18600水平。港股今早高開後，內地公布財新中國八月製造業PMI重返擴張範圍，好過市場預期，加上阿爺出招組合拳救市，繼減印花稅及降準後，再宣布劃一首房首付比例為兩成，及有傳內地或進一步放寬一線城市的樓市調控政策，內房股顯著做好，港股亦高開高走。
恒指高開210點，升幅曾略為收窄至193點，見18575半日低位，其後升勢再擴大，半日最多升517點，見18899半日高位，但50日線前未能一舉突破，中午恒指報收18851，升469點；國指升210點，升幅超過3%，報收6542；恒科指則升2.5%或104點，報收4283。半日成交額840.38億元，顯著增加，但有部份係上周四MSCI指數rebalancing部份未完嘅交易，今早上板，但撇除呢部份成交，今日全日成交額若然能突破1300億，9月都叫做有個好開始。
今日藍籌股普遍做好，雖然早段友邦(01299)跟大笨象(00005)逆市向下，但及後已收復失地，大笨象好淡爭持，友邦亦差不多。雖然財爺口硬話唔減印花稅，但港交所(00388)卻升3.2%，市場仍有人博研究小組會建議跟阿爺減股票交易印花稅，研究小組或有政策提出激活港股市場。除咗呢幾隻重磅金融股外，內銀股內險股顯著上升，A股近日走勢及氣氛改善，平保(02318)半日升6.1%，內銀股閒閒地升3至4%，招行(03968)半日更升近8%。
今日唔使問最勁係內房股，阿爺推組合拳欲救內地房產市場，雖然成效有待觀察，阿Man就唔多睇好，不過資金話之你，炒咗先算，中國海外(00688)跟華潤置地(01109)半日升一成，其他內房股閒閒地升一成以上，就連垂死爭扎嘅恒大(03333)半日亦升9%，融創(01918)最誇張，半日升逾三成。講真內房要有救，關鍵係銷售，未來內房都係要靠賣樓套現先有得救，問題係市場購買力早就消耗得七七八八，而市場對未來樓市唔睇好，咁內房企業賣唔到樓，一樣係神仙難救。政策提振能否令金九銀十重現，睇埋呢兩個月就知。一旦銷售不似預期，內房股遲下又打回原形。除咗內房股之外，建材股亦跟炒，不過阿Man都係嗰句，內房產業仍需要好長時間去養傷，推出政策只係阻止呢個產業情況繼續惡化，要扭轉弱勢，言之尚早。
港股9月算係有個好開始，加上8月跌咗超過8%，阿爺出招搞咁多嘢，嚟個反彈都要畀下面，目前尚待50日線突破企穩，如能企穩並重上19000水平，反彈料可持續，但外資早已去如黃鶴，如外資未肯重返，塘水滾塘魚下，港股都係有波幅，冇升幅，難有大作為。
麥狄文
(徐狄怡‧證監會持牌人)
