2023年8月23日
美國商務部長將訪華，市場憧憬中美關係或有改善，港股借勢反彈，未有理會隔晚美國10年期債息升至16年高位。港股昨日反彈167點後，今早反覆偏好，於17800水平爭持。
恒指低開28點後，一度倒升30點，早段A股走軟，拖累恒指曾倒跌60點，見17730半日低位，其後回升，半日最多升85點，見17867。中午恒指收報17852，升61點；國指升22點，報6119；恒科指微升2點，收3998。半日成交額只有425.39億元，少得可憐。
藍籌股個別發展，金融股中以友邦(01299)表現最好，半日升2.3%；大笨象(00005)跟港交所(00388)分別跌0.3%及0.7%。不過部份內銀股反彈，建行(00939)跟工行(01398)半日彈超過1%，招行(03968)則跌0.3%；內險股亦麻麻地，平保(02318)半日跌0.2%彈唔起。近日疲弱嘅消費股安踏(02020)公布中期業績多賺32%，半日股價升逾一成，進帳11.7%，藍籌之中表現最好。
科網股個別發展，百度(09888)公布第二季利潤增長44%，股價半日升4.4%，但未能重上130元；早已發咗盈喜嘅快手(01024)，公布中期虧轉盈，股價升1.4%。美團(03690)明日派成績表前靠穩，股價半日跌0.1%，不過都唔會去博業績。阿里(09988)交到一份咁好嘅業績，股價連90元都企唔穩，對其他科網股業績仲會有乜嘢期望。
雖然人民幣有啲反彈，似乎有無形之手維持秩序，但內房股仍然未有起色，內房債務問題根本解決唔到，叫人點會有信心將資金投入呢個板塊。碧桂園(02007)未知籌唔籌到錢應付到期債券利息，目前仲係30日寛限期之內，但應該都唔樂觀，加上又被踢出藍籌，股價半日跌6.7%，再創上市新低。其他內房股普遍下跌，龍湖(00960)跌少過1%算硬淨，其他內房閒閒地跌3%或以上，世茂(00813)半日急跌近16%，原因不外乎債務違約，連利息都還唔到。
港股由20300水平回落至前日17500水平左右，高位回咗近2800點，噚日RSI去到超賣水平，短線有技術反彈亦好正常，不過之前18000至18050呢個大支持位，失守後變阻力位，反彈未能重上18000水平企穩，後市都係難睇返好，暫時仍然處於弱勢，短線技術反彈後，只有繼續向下尋底。
麥狄文
(徐狄怡‧證監會持牌人)
