2023年5月5日
美國銀行風暴再度發酵，雖然FRC已被JP接手，但地區銀行股連日下跌，市場憂慮繼續有中小型銀行爆煲，美股隔晚繼續下跌。不過有美官員報評估銀行股波動是否涉市場操縱，略為紓緩市場恐慌情緒，美期喺亞洲市場反彈。港股亦做好，加上人民幣反彈，半日升逾百點，重返二萬水平。
其實美國官員依家先話評估銀行股波動有冇人為因素，反應真夠遲頓，其實由SVB事件開始，擺明就係一班空軍做世界，沽空地方銀行股，再借債價下跌散播利淡消息，引發中小型銀行擠提，而政府只表態保存款而不保股東利益，中小型銀行遇到擠提，短期流動性問題局住低價賣債套現，空軍借題發揮，高位沽空低位補倉獲利，中小型銀行股價大跌，好明顯係人為因素。
恒指高開112點，中國公布財新中國3月服務PMI回落，港股升幅一度收窄至19點，見19968半日低位。不過人仔走強，美期反彈，港股升幅再擴大，半日最多升260點，見20208半日高位。恒指中午報收20076，升128點；國指半日報收6809，升90點；恒科指半日升61點，報3917。半日成交額579.11億元，仍然係北水自己玩晒，未見有外來資金參與。
藍籌股以恒隆地產(00101)半日升5.6%表現最好，大笨象(00005)同友邦(01299)半日分別跌0.8%及2.2%；不過內銀股跟內險股則繼續做好，延續噚日升勢。內房股跟物管股今日亦繼續做好，融創(01918)境外債重組獲八成半支持，半日急升12.7%；同系融創服務(01516)4.8%；其他內房及物管股升幅由3%至近9%不等。ATMJ全線反彈，不過星期五都唔好期望有好大成交配合，純反彈都仲要睇睇，暫時只有美團(03690)叫企返幾條移動平均線，其他三隻重磅科網股，仍受制多條移動平均線。至於啤酒股就繼續下跌，沽壓未止。資金仍然係唔同板塊之間輪動，資金嚟嚟去去得嗰一注，塘水滾塘魚。
雖然港股呢兩日反彈重上二萬大關，但始終成交都係唔配合，仍然離唔開有波幅，冇升幅格局，除非成交平均重上1500億以上，否則喺北水回歸，平均成交都係一千億左右嘅情況下，港股難有作為，只有不同板塊炒作，高追一個唔小心走唔甩，最終又係成為大戶點心。
麥狄文
(徐狄怡‧證監會持牌人)
