2022年12月20日
美股隔晚持續疲軟，大摩預期企業盈利跌幅有機會好似2008年金融海嘯時咁惡劣，美股三大指數全線下跌，納指更跌逾1%。港股隔晚夜期跟ADR已腳軟，今日裂口低開再插水，半日市險守萬九大關。
恒指低開195點，其後跌幅擴大至334點，見19018半日低位後反彈，跌幅曾收窄至69點，報19283，為半日高位，上半場萬九關仍頂得住。中午恒指收報19089，跌262點；國指跌129點，報6475；恒科指則收4016，跌108點。半日成交額只有452.5億元，一如所料，愈接近聖誕節長假期，成交只會更加縮水，市況只會更為淡靜。
藍籌股普遍下跌，但友邦(01299)竟然逆市升0.8%，而表現最好係噚日插水嘅東方海外(00316)，半日彈返2.4%；金沙中國(01928)半日亦彈1.2%，長和(00001)亦係少數上升藍籌股，半日逆市升1.8%。至於ATMJ全線向下，跌幅由超過1%至3%不等，內銀跟內險股跌勢亦較顯著，跌幅閒閒地超過2%，以一向波幅較細嘅內銀股嚟講，跌超過2%沽壓都幾重。隨住假期逼近，港股成交縮減，投資氣氛轉趨淡靜，港交所(00388)回軟亦理所當然，半日跌1.5%。
留意ATMJ跟港交所呢幾隻重磅股，都已接近短線支位，一旦失支持位，大市調整深少少，去到20天線(約18861)及100天線(約18236)機會大增，有心想買貨亦唔使急，呢兩日或有更加抵買嘅價錢畀你入場。
話咗內房抽水潮有排玩，今日輪到旭輝(00884)跟雅居樂(03383)配股上板，兩股半日分別跌15%及16.7%，其他內房股及物管股受累，碧桂園(02007)跟碧服(06098)半日分別跌6.8%及6%，藍籌之中表現最差。其他內房及物管股無一倖免，加上中國12月LPR(貸款市場報價利率)維持不變，減息預期落空，內房呢個板塊今日唔跌先出奇。
至於大市整體表現淡靜，之前阿Man已講過資金由強勢板塊轉向落後甚至弱勢板塊埋手，更見二三線股，甚至size更細嘅股仔落鑊，劣幣驅逐良幣下，本輪升勢已告一段落，開始步入整固期。若然今日失守萬九關，大有機會下試20天線，甚至100天線尋找支持，再強調一次，好友只要守得住100天線，後市仍有機會向上挑戰20000至22000，暫時對後市仍然係審慎地樂觀。
麥狄文
(徐狄怡‧證監會持牌人)
