2022年7月8日
隔晚美股續彈，道指已三連升，跟標指隔晚齊齊升逾1%，納指更升逾2%，債息回落帶畀科技股一個反彈機會，就連弱到爆嘅晶片股都想想哋反彈。不過呢美股成交有少少轉弱，呢幾日反彈係借住債息回落，有資金入場短炒，但大方向阿Man認為美股仲要做多次底，而七八月嘅業績期，只要啲企業派成績表稍有唔啱睇，美股隨時急急腳掉頭回落。
目前市場對通脹升溫嘅憂慮有所緩解，港股早段做好，恒指高開318點，但22000關有阻力，開市升幅已即收窄，於21800水平爭持。其後日本有報道前首相安倍晉三喺奈良，於發表演講時被槍擊，目前生死未卜，港股更一度21652半日低位，升幅僅餘10點。中午恒指報收21658，升15點；國指7524，跌14點；恒科指報收4798，升18點。半日成交額只有601億元，周末前夕，缸邊友入市唔積極。暫時港股維持日升日跌，反覆上落格局，周末前夕亦唔見有乜方向，睇嚟都係少做少錯，唔做唔錯。恒指移動區間大約係21000至22000之間。
藍籌股表現好壞參半，阿里巴巴(09988)升至超過四個月高位，半日升近4%，升穿120元阻力，睇下120元能否由阻力變為短線支持。石藥(01093)半日升4.5%，藍籌之中表現最好，但另一生科藥龍頭藥明生物(02269)，半日倒跌1.3%。內地消費股表現較差，啤酒股今日普遍下跌，食品股及體品股亦有沽盤。
汽車股早段表現唔錯，吉利(00175)公布6月銷量按年增26%，盤中曾見18.28元，但半日升幅收窄至0.1%。其他汽車股亦高開低走，都係跟住個市回吐。不過汽車股後市仍可以睇高一線，隨住銷量喺國策扶持下回升，再加上供應鏈回復正常，下半年汽車股應該可以跑贏大市。
內媒報道，長沙、珠海、江門等地區部分銀行已將首套房貸利率下調至4.25%；隨住穩樓市政策陸續出台，部分地區房地產市場已顯露回暖跡象。不過困擾內房嘅債務問題始終未解決，內房股暫時都係個別發展，未見整個板塊有太大起色。阿Man都係嗰句，買內房股要有耐性，同埋要揀今次內房債務問題嘅生還者，當然央企國企背景優先考慮，而財政狀況較佳嘅內房股，亦有望喺今次內房淘汰賽跑出，至於嗰啲遲遲未能公布業績，又或者連核數師都搞佢唔掂，劈炮唔撈嘅債務炸彈內房股，都係避之則吉。
麥狄文
(徐狄怡‧證監會持牌人)
