2022年6月2日
隔晚美股繼續反覆，早段受經濟數據好過預期帶動高開，不過美國聖路易斯聯儲銀行總裁布拉德(James Bullard)強調，聯儲局今年應當將利率調高至3.5厘，令美國10年期債息回升至2.9%水平，美股高開低走，三大主要指數下跌，拖累港股ADR及夜期走軟。今早港股亦隨之低開，恒指目前於50天線(20958)爭持。
恒指低開237點，跌幅一度收窄至228點，見21066半日高位，可惜周末前夕，缸邊友唔多願入市，反而減磅居多，未幾大市跌幅擴大至410點，見20884，不過50天線點都有啲支持，其後跌幅收窄。恒指半日收報20960，跌334點；國指中午報7220，跌125點；恒科指半日收4363，跌70點。半日成交額557.65億元，長周末前缸邊友唔肯郁手，不過對於好友嚟講，跌市成交縮水都值得安慰嘅。
藍籌股九成下跌，美團(03690)今日收市後派季度成績表，股價半日跌2.9%，喺呢一輪反彈浪之中，美團喺ATMJ之中跑贏，升咗咁多，一旦業績出嚟無乜驚喜，股價好似騰訊(00700)業績後回返多啲都好正常，難怪呢兩日美團被空軍重點攻擊，沽空比例高達20%。騰訊半日跌1%，暫時算硬淨；至於一向弱過藥煲嘅阿里(09988)業績公布後威咗一陣，當大家等佢表演，博佢重返紅底股之際，阿里有心無力，股價今日跌3%，分分鐘又落返90水平之下。其他重磅藍籌股今日普遍腳軟，大笨象(00005)跟友邦(01299)半日分別跌逾1%，內銀跟內險股繼續無厘神氣。電能(00006)半日升2%，係最大升幅藍籌股，公用股嚟升最多，可見市場資金有幾保守。
今日本地地產股除咗長實(01113)逆市升1.3%之外，其他全線下跌，恒地(00012)、新世界(00017)跟恒隆(00101)分別跌4%、5%及5.2%，跌幅較為顯著，因為三股同被剔出富時羅素主要追蹤房地產嘅FTSE EPRA Nareit Developed Asia Index。不過阿Man都唔會呢個時候去撈貨，主要係長周末在即，加上近日樓市表現受壓，雖然本港樓市剛性需求仍在，只係樓價有回調，氣氛麻麻，本地地產股暫時都係有波幅，無升幅。
唔知已經幾耐，生科股個板塊死得直一直，今日呢個板塊繼續捱沽，隨手執一隻生科股，閒閒地跌4%以上，藥明生物(02269)作為龍頭，半日跌少過1%算好好，不過都唔捱得幾耐，只係藥明話晒有錢賺，相對無盈利嘅生科企業，高少少PE總好過無PE。相反得到政策扶持嘅汽車股繼續走強，今日呢個板塊逆市上升，只係整個板塊喺呢一個月內累計升幅唔嘢少，有獲利沽盤減磅好正常，無貨就唔好多心去接人哋啲套現貨喇……
雖然恒指收復幾條移動平均線之後，市場唔少人預計港股可以繼續向上挑戰100天線，即係22000水平，不過阿Man就相對保守，維持港股係上落市睇法，尤其50天線仲未企得穩，隨時可以返落去再次考驗10天及20天線，講嚟講去市場缺水，邊有咁容易扭轉弱勢，頂多咪喺幾條移動平均線上落，離唔開空間移動呢個悶局。
麥狄文
(徐狄怡‧證監會持牌人)
