2022年4月29日
噚日中學同學兼老友問我點過生日，坦白講都幾十歲人，你估仲係當年中學時叫晒成班friend去唱K，然後生日嗰個免人頭費再免切餅費，玩到第二朝飲早茶咩！老啦，幾多年都未試過玩通頂，只係兩條老嘢落樓下骨場按個腳再去食個飯，返屋企玩貓算啦。
噚日揀咗隻恒指牛(54617)出嚟，喺朝早10點15分至10點30分見指數喺五分鐘圖上落到50分鐘線(五分鐘圖10線)有支持而落場，平均入貨價為0.0495元。
午後返嚟見到指數二話不說地向下插落去，本以為五分鐘圖上嘅中軸會支持得住，可惜喺下半場一開市就見到支「大陰燭」向下再插，(54617)頂得順但我頂唔順，以下半場開市後15分鐘走隻(54617)，以期內高低位0.053元/0.048元計，平均走佬價為0.0505元，算是和到個手續費。又...鬼知恒指花咗成個下半場嘅時間喺五分鐘圖上行個「V型」走勢出嚟咩，(54617)收報0.062元...真係唔可以咁計，如果係可以預知未來嘅話，就應該唔會有人770蚊接騰訊(00700)貨。
隔晚美股造返好，以為今朝都可以帶動到港股上揚，喺五分鐘圖上破個「V型」反彈頸線，但係亞洲時段美指期貨下行，港股都忽然變軟，開市報20271點，微跌4點。
依家10點1分，同老友兼新一代靚仔股評人李浩然吹兩句水，提提佢聽日係姜濤生日之後，睇返個市，依家先至見到恒指有個比較明顯下行走勢，正當出淡倉做DT注時，指數一個鯉魚翻身又屈返上去，激氣。拉返闊啲個五分鐘圖，見到指數彷彿今日行咗個「小圓底」出嚟之後，再將噚日個「V型」反彈計埋一齊做一個「杯柄」出嚟咁款；認真，「杯柄」從來都係「圓底」行先，個柄係「圓底」、「三角」還是「長方」都真係無乜所謂，因為重點係個「杯」，你有無見過一個「杯」係尖底？(呀...有...水機隔離嗰筒紙杯...我收返條問題)
可能港股嘅氣場同我今日有啲唔配，不如又睇下美股。蘋果公司及亞馬遜的業績於噚晚收市後出爐，股價分別升4.5%同4.7%，推高美股指數向上，其中納指更升3.1%，收市報12871點。日線圖上見納指於保歷加通道底線稍稍彈高，向住10天線方向出發，同時Slow STC(14,3)兩線亦見觸底，明日到目前亞洲時段納指期貨下行中，不過以目前呢個納指日線圖計，保歷加通道口有開始收窄嘅情況，指數的確有機會向10天線方向再行多一步，再加上今日星期五，出貨過夜又要過兩晚，呀！係過三晚先啱，下個星期一(5月2日)勞動節補假，還不如等下個星期二(3日)返嚟嘅時侯再作決定。
稿不過，基於件變動嘅關係，下個星期二口果想繼續追睇納指走勢同出唔出到貨做Trade嘅話，讀者們就需要直接上我FB或者新開嘅牛牛圈啦，因為【輪證贏家】今日會係喺《信報》最後一次出現，感謝《信報》及背後編輯組上上下下七年來嘅支持同幫忙，其餘的一切照舊，多謝繼續關注同支持。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
