2022年4月28日
Facebook有一個功能係提你Add咗嘅朋友幾時生日，所以每逢生日嗰日必定有一堆FB朋友送上祝福。五年前因為喺我生日前五日公公病逝，諗到頭七未過所以喺FB上熄咗生日提示，到依家都無再開返，所以每逢今日喺FB上都唔會再見到一堆FB朋友同你講句Happy Birthday，正因為咁，無心地「篩」走一班仍然會message你同你講生日快樂嘅人，最後你會發現屋企人佔嘅比例係最多，而仲記得你生日嘅「朋友」，關係應該如同家人，多謝你哋(包括我舊老細，佢真係好好記性)。
前晚美股大跌，老欄老友阿文喺FB話因為深夜時分再播由鄭少秋主演嘅天地男兒，呢套劇好似話有60幾集，播晒嘅話應該係兩個月後嘅事，即6月底左右，如果「秋官效應」仍然生效嘅話，咁五窮六絕就變得更「合情合理」。
相信「秋官效應」影響到嘅唔單止係美股，今早港股開市升172點，開市報20118點，以今朝見到嘅牛熊證街貨圖計計中間位為20099.5點計，指數算是向上靠近返熊證街貨。不過，開市無幾耐指數已經急轉向下，還好五分鐘圖上有保歷加通道中軸作為支持，至依家9點38分，指數喺五分鐘圖保歷加上升通道中有喘定情況，其後指數再上，五分鐘圖更見保歷加通道口拓闊；轉以小時圖見指數今早都上返去20小時線以上位置，睇嚟指數真係補完裂口之後反方向行咁喎。
恒指牛(54617)，收回價19600點，同現價有逾430點差距，約47倍槓桿夠做DT，見依家五分鐘圖上指數同50分鐘線(五分鐘圖10線)都仲有啲距離，不如試下等指數同50分鐘線再靠近啲嘅時侯，見到支持的話先至偷位出場；安全嘅當然可以等五分鐘圖條Slow STC(14,3)回落返去超賣水平時先至出手啦。
稿件變動：【輪證贏家】及【輪證下半Part】即日起已登陸富途牛牛圈，而【輪證贏家】於5月開始會告別《信報》，其餘的一切照舊，多謝繼續關注同支持。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
