2022年4月26日
噚日手多揀咗隻納指Put(10387)出嚟，都確實係比較少玩美指輪，所以都係出paper trade試下水溫，平均買入價為0.226元。
隔晚納指反覆上升1.29%，收市報13004點；依家9點16分，等緊恒指完U時睇納指期貨走勢靠穩，上落都只係幾點嘅範圍，(10387)要反映番噚晚納指嘅表現，應該都要等恒指正式開市後先見。
到咗9點21分，恒指完U，開新報19984點，升119點，過多兩日就係期指結算日，而指數又補咗317嗰大型裂口位，隨時呢幾日走勢會喘定，甚至有回升嘅情況。但見到日線圖上保歷加通道口拓闊中，而牛熊證中間位今日計過係20349.5點，同恒指開市口價比，現價仍然都係靠近牛證街貨，點計都似係應該仍然偏淡。
送完我家老爺出門口之後，恒指正式開市，先睇返隻(10387)，喺9點34分見輪價報0.204元，應該反映咗噚晚納指上行嘅情況，paper trade攞感覺啫，OK嘅；至於恒指則喺開市後首三分鐘，指數都未見到有明顯方向，到依家9點43分，恒指五分鐘圖上見保歷加通道口拓闊中，而指數沿住保歷加通道頂線上行，Slow STC(14,3)本身喺中軸位附近，而依家都已經進入咗超買範圍，如果稍後保歷加通道口再keep住拓闊的話，咁Slow STC(14,3)就會見超買再超買，即市好倉偷位出動嘅話，就留意保歷加通道口有無繼續拓闊比位指數再行。
又再玩耐少少嘅Trade嚟講，其實上個星期有讀者留言問咗我三隻股份，先後都逐一解答；但如果要我三揀一的話，港交所(00388)可能係我短期會繼續留意住嘅股份。
坦白講，港交所股價的確低殘，而且日線圖更見整條保歷加通道向下中，就正正因為整條保歷加通道向下，而不是通道口拓闊，所以先至可以開始部署。前日陽燭出現，再搭噚日小陰燭，組合成「身懷六甲」，今日隨時反彈但明顯力度唔夠，換小時圖見依家股價被10小時線(小時圖10線)頂住。
港交牛(55049)，收回價300元，同現價有逾7.86%收回距離，槓桿有約11.42倍，即使DT都夠用，等小時圖確認上破得到10小時線小注進場的話都唔好貪心，留意日線10天線破唔破到啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
