2022年4月20日

【輪證贏家】恒指Put 裂口底見

噚日揀咗隻恒指熊(69297)出嚟，大貪地博指數補返3月17日嘅大型上升裂口。其實入隻(69297)個位同玩Swing Trade嘅方法一樣，都係等Slow STC(14,3)上到超買水平落場。落咗場之後，其實當時指數同Slow STC(14,3)走勢同步，都係由高位回落，而去到1點45分左右，五分鐘圖上已經見到Slow STC(14,3)兩線落返去超賣水平，直至到下晝2點20分先至開始見到指數同Slow STC(14,3)回升。如果唔貪心，喺呢段時間走隻(69297)的話，以當時(69297)高低位做過0.099元/0.085元，平均走貨價為0.092元，個零鐘平均賺幅有10.18%，雖然(69297)本身槓桿唔係話好高，但咁短時間可以爬到呢個賺幅返嚟，總算托賴。

我家老爺已如常返工，今朝放份早餐喺佢個袋度，臨出門口前佢同我講公司仲有嘢食，聽日請咗請，隨手將袋裡面嘅早餐拎返出嚟。望望月曆，聽日係21號，呀！結婚7年紀念，同時都即係【輪證贏家】呢隻稿都即將踏入7週年，感謝大家一直以嚟嘅支持。

老爺出門嘅時間即係恒指完U，隔晚美股升返噚日港股跌幅咁滯，今朝早恒指開市微跌54點，報20972點。到正式開市之後，指數低開有見高走，至依家9點44分，喺五分鐘圖上指數重上250分鐘線(五分鐘圖50線)，同時保歷加通道口拓闊，但係見指數都好似未有力向上再衝咁。

再睇埋恒指牛熊證街貨圖，今日見到熊證都有新增街貨層，最貼價落到去21200至21299點，而牛證噚日被人殺退至20800至20899點，以依家9點59分，恒指做緊21001點，跌26點，以呢個價嚟講，指數算是企喺牛熊街貨間位置，怪不得開市首半個鐘指數走勢同變幅都唔大。但以街貨量嚟計，下方牛證都真係比上方嘅熊證多，又日線圖上見指數仍然靠近保歷加通道底線，而底線仲見到有明顯勢頭向下，唔通道真係咁決心要補嗰大型裂口？

恒指Put(27294)，行使價20898點，同現價只有0.71%價外，9月中到期，斷估補裂口都唔會補到去9月掛，低引伸、高槓桿亦係吸引之處。呢個就真係可以試下放耐少少，不過搵位入嚟講，沿用返以五分鐘圖Slow STC(14,3)上到超買位啦，C9更係想再低多一兩格先嚟買貨架啦。

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。