2022年3月25日
呢個星期真係落雨落不停，潮濕又大霧，只能風狂開抽濕機；在家工作嘅日子真係有辣有唔辣，雖然成日「困」住喺間屋度，但呢啲天氣你出門口返工又躘蹱，又要撐傘又要拎袋，顧得頭嚟顧唔對腳，對襪濕晒返到公司「醃」住，除定唔除好？(所以我舊公司長備人字拖一對)
恒指今日都唔係咁好天，開市再跌210點，落返去21735點。雖然落咗200幾點，但都未傷到牛證街貨任何一條毛，事關第一層街貨仲喺21400至21499點，呢度有相當於700幾張期指街貨，亦都係牛證重貨區；暫時收回嘅都只係今日上市嘅牛證。至於熊證方面，係有兩層新增街貨層，但其實噚日得幾隻熊證上市，收回價喺22200至220299點，所以你會見到22300至22399點嘅街貨真空，唔係無人買，係噚日無貨被人買，所以無儲到街貨出嚟。
依家9點42分，恒指低開後火速高走，之前都有講過呢兩三日指數開市之後都係咁，喺五分鐘圖上第一粒燭開出嚟之後，好快生咗條下影線出嚟撐返高粒燭，然後就同開市表現呈反方向走，所以今朝都同戰友們一齊開隻好倉，採爬格仔策略。
早兩日睇恒指日線圖時都有講過，指數上到近日高位22423點之後稍有回落，可惜上影線又唔夠長，燭身又唔夠肥，好勉強都唔可以話高位呢粒係Shooting；去到噚日，上影線都真係未夠長，不過今次燭身就夠扁啦，可恨擺位已經唔屬於一個高嘅水平。對於完美主義嘅圖表派嚟講，呢兩粒燭真係同雞肋一樣，或者就係因為咁，所以令到恒指今日跌210點開市之後再見跌幅收窄。嚟到9點55分，恒指跌幅收窄到跌51點，做緊21888點。
再睇返恒指五分鐘圖，有條頸線我都係今朝先至發現到，就係噚日全日整個五分鐘圖原來行咗個「大圓頂」出嚟，頸線就喺噚日朝早嗰兩隻雀仔腳，同埋尾市時力守緊個位。而今朝開市恒指喺五分鐘圖上見大裂口下挫，不過火速低開高走之後，依家(10點11分)指數被50分鐘線(五分鐘圖10線)、「大圓頂」頸線頂住，某程度上都反映到「大圓頂」頸線嘅阻力頗強，正因為咁，好淡雙方角力下，指數喺接近「大圓頂」頸線附近再生多個「三角形」出嚟，以反映雙方爭持中。
卡關就係呢個「三角形」，「三角形」其中一個「特點」係可以不停地修正，即使見到有稍稍突破，但好快亦都會被「重新規劃」一個新嘅「三角形」出嚟；除非出現一支比較大嘅燭進行「破壞」，咁「三角形」就無辦法再劃落去。
恒指熊(68711)，收回價22600點，企喺重貨區後安全啲，因為比較遠，同現價都有逾700幾點差距，所以槓桿得約22.56倍，不過做DT嘅話都足夠嘅。五分鐘圖指數上破唔到「大圓頂」頸線，或者「三角形」見向下突破時出動。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
