2022年3月24日
噚日揀咗隻恒指牛(55203)，平均買入價為0.0765元，但去到下半場時見到恒指再稍稍再向下嘅情況，(55203)有啲危危地，所以都係拉返近少少個時間圖，以10分鐘圖上見指數失保歷加通道中軸作為(55203)走位訊號。
最終，喺噚日下晝1點30分時，喺10分鐘圖上見指數開始失保歷加通道中軸，再等多五分鐘，指數再失多少少，為免夜長夢多，都係將隻(55203)掉走。以1點30分至1點45分(同樣都係15分鐘Trading time計算)呢段時間掉走隻(55203)，按當時高低位做過0.076元/0.066元，平均沽貨價為0.071元，呢趟平均損手7.19%。
早兩日手痕揀咗隻騰訊(00700)淡倉出嚟，主要都係一反常態，博佢今年份業績唔多掂之餘，嗰時仲見到日線圖上有20天線頂，但可惜第二日粒聲唔出就破晒上去，隻淡倉都無落到場。噚日騰訊終於發咗成績表，被市場指去年第四季表現遜於市場預期之下，股價今早裂口低開，依家9點53分，暫時最低見過373元，怕且今朝恒指向下跣低都係被佢拖累。
睇返恒指，今朝早低開151點，開市報22002點之後，例牌到正式開市指數再向下插，但同時亦都好快見到條下影線出咗嚟，即見低開高走。到依家指數跌幅由最多嘅過200點，收窄至依家80幾點，喺五分鐘圖上見指數去到接近保歷加通道中軸之後就見停。等咗一陣見指數都係上唔到中軸以上嘅位置，即時淡倉何樂而不為？
睇返恒指日線圖，陰陽燭圖計噚日喺日線圖上的確見到上影線出現，但由於上影線又唔係話好長，燭身又唔夠扁，難以講佢係「射擊之星」。Slow STC(14,3)兩線雖然上到80以上嘅超買範圍，但換上保歷加通道見指數其實同頂線都仲有一段距離，雖然收窄中，但迫佢凌空轉勢談何容易。
再睇埋恒指牛熊證街貨圖，上方熊證噚日被追殺至22400至22499點，而下方牛證則新增上到去21400至21499點。中間位則為21949.5點，同恒指現價21910點都只係差39.5點，基本上都可以話佢企喺中間，怪不得指數有種唔上唔落嘅感覺啦。
望望鐘，依家10點22分，恒指五分鐘圖上見指數向下再落並低於今朝早見過嘅下影線低位，還好基於保歷加通道仍然呈下，所以係有時間可以等返條指數慢慢向上，偷到位嘅可以等指數再次靠近50分鐘線(五分鐘圖10線)，甚至係100分鐘線(五分鐘圖20線)，然而出淡倉；安全嘅，一如以往等Slow STC(14,3)上返超買水平時出手。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
