2022年3月21日
上個星期五(3月18日)喺下晝揀咗隻恒指牛(60098)，以五分鐘圖上見到指數上破250分鐘線(五分鐘圖50線)同500分鐘線(五分鐘圖100線)兩條線先至出動。
喺下晝1點35分，已經見到指數爬得返上呢兩條線上面，再比多五分鐘更加何以完全確認得到，(60098)可以偷位落場。以1點40分至1點55分呢15分鐘作為入市時間，(60098)高低位為0.085元/0.068元計，平均入市價為0.0765元。
都唔知係有Pattern定係我好彩，呢期每每上半場都係下跌，去到下晝就會回升，仲回升得比較戲劇性，指數喺下晝一度出現倒升嘅情況，隨住五分鐘圖見保歷加通道口拓闊，Slow STC(14,3)亦都出現超買再超買嘅走勢，去到下晝2點半左右，Slow STC(14,3)開始有回調情況，再過多五分鐘，回調雖然幅度唔多但走勢明顯，於是喺呢個位完成隻(60098)DT。又以2點35分至2點50分呢15分鐘作為走貨時間，(60098)高低位做過0.103元/0.091元計，平均走貨價為0.097元，一個鐘頭鬆啲平均賺幅為26.8%。
今朝早我家肥貓「如常」的晨咁早就起咗身，坐喺我隔離直至恒指完U之後，開報升逾400點，再上21800點樓上，不過，到式正開市之後，肥貓已經走返入佢嘅貓窩度再瞓，而恒指都見高開低走，五分鐘左右指數升幅收窄至155點，報21567點。10點未到，已經見到恒指出現倒跌嘅情況，雖然唔可以話係意料中事，不過日線圖上指數呢四日都有升勢，唯獨DMI嘅ADX向下行，「3000幾億成交都話無力？」予其話無力，倒不如話升得過急要抖抖，出現咗一種「無以為繼」嘅情況，仍到DMI嘅ADX喺市升市向下行。
睇返恒指牛熊證街貨圖，今朝開市指數向上先殺多兩層熊證街貨，呢度夾埋有相當於482張期指，而最貼價變成21800至21899點，以截至依家9點54分止，今日恒指高位(暫與開市價相同)都叫做踩過入呢一層，而下方牛證最貼價層為20500至20599點，係呀，今日無新增牛證上市，而呢度有逾1100張期指，重貨區嚟架，所以你會見到啲街貨都唔係講玩笑。
依家10點5分，指數雖然見回升返，不過開始幅度減低，所以五分鐘圖上嘅保歷加通道口都見收窄。以點數計，其實目前指數已經再次處於20天線以下水平，再加上稍後有疫情記者會，恒指熊(57902)，收回價21850點，同現價有逾400點差距，有約36.47倍槓桿為市場上最高，留意換股比率係12000，唔係10000。五分鐘圖見指數依家都仲喺咬住50分鐘線(五分鐘圖10線)同100分鐘線五分鐘圖20線)，Slow STC(14,3)兩線都準備落到超賣水平；換個小時圖，指數到依都仲未穿10小時線(小時圖10線)，不過Slow STC(14,3)兩線有高位回落嘅情況，留意小時圖如果穿得埋條10小時線，咁(57902)都可以安全出動。
今日稍後時間要去被姑娘抽血，下半Part可能會晏少少。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
